Mizorama grape chingtuten dan hnuaia grape atanga siam wine siam leh zawrh phalsak tura sorkar an ngen fo hnuah nimina Council of Minister thukhawm chuan dan hnuaia wine siam leh hralh chhuah a rem ti.
Council of Minister thutkhawmah hian Excise & Narcotics department (END) atanga thu ngaihtuah tur chhawp, The Mizoram Liquor (Prohibition) Draft Rules, 2022 chungchang ngaihtuah a ni a, zu zawrh khapna dan chu kawng taka kalpui zel nise an ti.
He rules hnuaia tel turin END-in an duan ‘Wines Rules’ chu nimin thutkhawmah hian pharh a ni a, minister rualte chuan sawihoin, ‘Wines Rules’ chu an pawm.
Hemi chungchanga The Zozam Times zawhna chhangin Excise Minister Dr K Beichhua chuan Mizorama kuthnathawktuten grape an thar chhuah atanga an siam wine chu sacramental wine leh beverage atan sorkar phalna hnuaiah zawrh phal a ni tawh dawn tih a sawi.
Dan hnuaia grape wine zawrh phal a nih takah chuan excise force-ten May 27, 2022-a Millenium Centre-a an man chu pek let an ni dawn em tih zawhna chu chhangin, excise minister chuan, “Kha kha chu tuna MLP Act ang khan kan la kalpui ang,” a ti.
Excise minister chuan, Council of Minister thukhawmin a phalsak tak hi official takin gazette tihchhuah vat a nih a beisei tih a sawi bawk.
Tar lan fo tawh angin Mizoram khawchhak lam, Champhai leh Hnahlana grape chingtute chuan dan hnuaia grape wine siam leh zawrh phalsak turin Mizoram sorkar an lo ngen fo tawh a, May 27, 2022-a excise force-ten grape wine thahnem tak an man hnuah phei chuan grape chingtute hian sorkar hi wine rules tha tak siam turin an nawr na zual a ni.
Grape atanga siam chhuah wine-te dan hnuaia siam leh zawrh phal a nih theihna tur hian kuthnathawktute chuan kawng hrang hranga hma lain, political party hrang hrang MPCC, ZPM, PC leh Mizoram BJP te hnenah wine siam tura an dodal lohzia tihlanna no objection certificate (NOC) te pawh an la hial a ni.