Mizoram Pradesh Youth Congress Committee (MPYCC) chuan SEDP-ah hlawhchhamah sorkar an puh.
Nimina an thuchhuahah MPYCC hian, August 29, 2022-a Mizo Hnam Run chhung inkhawma minister leh MNF Adviser Robert Romawia Royte-in ‘SEDP Rs 25,000 dawng turte hian MNF a sorkar zel chuan Rs. nuai thum aia tlem lo an dawng dawn tih hi, an hotute relna atang khan a chiang’ tia sawi chu an lo intiam tawh angin an sorkar chhung ngeiin SEPD Rs. nuai thum chu chhung tin hnenah an sem loh turzia chiang takin a tar lang nia sawiin, “Mipui an bum ni loin, mipui hmaah dawt lian tak an sawi a, ngaihdam dil rawh se,” an ti.
Congress thalai hian MNF hi an sorkar zel dawn tih khawiah mah a awm lo a, tun dinhmun enin mipuiin rinna an nghat zo tawh lo a, SEPD hi a hlawhchham tih chiang takin a lang tih an sawi.
MPYCC hian Sports Minister Robert Romawia Royte-in, ‘SEDP hi Rs. nuai thum dawnah hian a tawp mai dawn lo a, kan sorkar chuan kan kal zel dawn a ni,’ tia a sawi chu mipui zah lohnaah an ngaih thu sawiin, MNF party kum li an sorkar chhung Rs 25,000 an sem tur thu chauh hriat a la ni a, Rs. nuai thuma a tawp leh tawp loh tur hi sawi ri tawh lo turin an ngen tih an sawi.