Aizawl: Aizawl Mayor Lalrinenga Sailo chuan in sak khuahkhirhna dan, AMC Building Regulation chu khauh zawka kalpui a nih tawh tur thu leh dan zawm lote hremna pawh a leh sawma tihpun a ni dawn tih a sawi.
He thu hi nimina AMC councillor-ten Swatchh Bharat Mission (Urban) zirchhianna hun an hmannaah a sawi a, mayor chuan, “Thawhtannia Executive Council thukhawmin Building Regulation zawm lote hremna sum chawi tur chu a leh sawma tihpun a remti,” a ti.
Hun kal tawhah building permit ang loa in satute chu pawisa chawitira permit pek chhunzawm a lo ni thin a nih pawhin tun atang chuan hremna hian permit pek kawngah awmzia a nei tawh dawn lo tih sawiin, “Penalty hi ngaihdamna a ni tawh lo ang,” a ti a; AMC dan zawm lote chu dan angin lung in tan thlenga hrem an nih tur thu a sawi.
Aizawl mayor chuan councillor-ten bial tana thahnemngaihna chu fakawm a tih thu a sawi a, thangtharte chenna tlaka Aizawl khawpui siam tura a enkawl kawnga thawkho zel turin a sawm a ni.
Swatchh Bharat Mission (Urban) zirchhianna hun hi Municipal Commissioner Zothanmawia’n a kaihruai a, UD&PA Department Joint Director (Admin) Malsawmzuala leh Deputy Director (HQ) Lalhruaitluangi te hnen atang presentation ngaihthlak a ni a; SBM kalphung leh thil hrang hrangte hrilhfiahna hun hman a nih hnuah sawihona zui a ni.