Aizawl: Central YMA rorelna sang, Central Executive Committee (2021-2023) thutkhawm chuan Mizoramah ruihhlo do turin pawl din an rel.
Thawhtanni zana Tuikhuahtlang-a Central YMA pisa-a CEC thutkhawm chuan ruihhloin Mizoram a run mekna thlir chungin Central YMA hnuaiah ruihhlo do pawl, Central Anti Drugs Squad (CADS) din leh a rem ti a. September 9, 2022 zan hian member-te lawmna leh hlanna hun hman a ni ang.
CADS term hi thla hnih chhung zel ni tura ruahman niin, member 50 zel an awm ang a. CADS member turin Aizawl khawpui chhunga branch YMA 108 atangin mi pakhat theuh ruat tura beisei an ni.
Sept – Oct, 2022 chhunga CADS hruaitu tur ruat nghal bawkin, convener Roneihthanga, Fin. Secretary, Central YMA; Asst. Convener K. Darthantluanga, CEC; Secretary Lalsawma Ralte, CEC leh Asst. Secretary R. Lalchhandama, CEC te an ni.
CEC thutkhawmah hian hnam dang dan loa sumdawngte dapchhuah chungchang sawiho ni bawkin, hma lak zel dan tur duangin sorkar hmalak mekna ngaihchan an remti bawk.