Aizawl : MPCC General Secretary Chalrosanga chuan an party manifesto thenkhat tihchhuah turah an tih hlawhtlin theih loh tur tar lan a nih dawn loh thu a sawi.
MPCC Campaign Committee-in Undivided Aizawl District fan chhuah programme a duan kal zelah nimin khan Congress MLA hlui Chalrosanga leh a hote chuan Lengteng Constituency tlawhin Dulkte khuaah party intawhkhawmah thu a sawi a. “Keini party pawhin thla leh mai hian kan manifesto thenkhat rawn tihchhuah kan tum, tih theih loh mai mai manifesto kan rawn nei ve dawn lo,” a ti.
ZPM leh MNF party chungchang sawiin Chalrosanga hian, “ZPM Leader Pu Lalduhoma te pawhin in khuaah, in bialah lo kalin ‘Sawhthing kan lei dawn’ an tihte hi Aizawl khawpuiah kawng chhawng kan siam ang tih ang leka tawktarh a ni,” a ti a. MNF party chu sum enkawlnaah an hlawhchhamah puhin, “Treasury khar lek lek reng a ni a. Sorkar hnathawk an beidawng a, hlawh lak mumal loh leh GP fund te lak mumal theih loh te, Bank loan a huna an rulh theih loh avangin an dinhmun a chhe hle,” tia sawiin, SEDP an tlangzarh mek hi an party tana chhiatna thlen mektu a nih thu a sawi.
Chalrosanga hian Congress Party chu Zoramin hruaitu tha a mamawh apianga par chhuak thin tih sawiin, “Mizoram mipuiin tun dinhmunah sorkar tha an au leh nuai nuai a, vawiina MPCC President Pu Lalsawta a lo ni leh ta chu malsawmna leh vanneihna a ni a. A hoa rorelna dik leh tha din a ni ang,” a ti bawk.