Aizawl : Tuikum bialtu MLA, Deputy Speaker ni bawk Er. Lalrinawma chuan nimin khan a bial chhung Sialhau khua tlawhin Buanhmun Handloom Cluster hnuaia puantaha eizawn tumte nen an inkawm.
Er.Lalrinawma chuan a bial chhung tana MLA Fund a hmuh za 80% vel zet chu eizawnna lam hawi atan hman thin a nih thu sawiin, a khua a zirin eizawnnaa bul an tanpuina erawh a dan thu a sawi.
Tuikum bialtu MLA chuan, a bial chhung Khumtungah chuan Balhla chin an uar avangin link road an ngaipawimawh a, Chhuanthar lamah chuan Furniture lam an uar thung tih sawiin, Sialhau khaw tan hian Puantaha eizawnna chu a tha ber dawn nia an hriat avangin Buanhmun Handloom Cluster kalpui a nih thu a sawi.
Buanhmun Handloom Cluster hi chhungkaw 31 velin puan taha an eizawnna tur a nih thu a sawi a; Sialhau khua chu Zoramin puantah ah an hriatzui ngei a beisei thu leh sawrkarin bul a tanpui tawh angin a hlawhtlinna chu anmahniah a in nghat thu puantaha eizawn tumte hmaah chuan a sawi.
Buanhmun Handloom Cluster hnuai puan taha eizawnna bul tan tum chhungkaw 31 vel tan hian bial MLA hmalakna in puan banna leh a thilna hmun tur concrete building tha tak chu Sialhau khaw chhungah sak a ni tawh a ni.