Aizawl : Siaha leh Titlao (Tuitlawk) inkara Culvert tla bal chu nimin khan District Disaster Management Authority (DDMA), Siaha in a hmunah tlawhin hmalak zel dan tur enfiah.
DDMA, Siaha aiawhin Additional Deputy Commissioner leh Chief Executive Officer ni bawk Donny Lalruatsanga leh he lai kawng enkawltu Mizoram PWD hotute chu kawng thawm that dan tur sawiho in, a hmun an tlawh nghal a ni.
Tun dinhmuna hmalakna hmasa ber atan he kawng chhuat tla bal hi a helna tur siam nghal niin vawiin hian lirthei zawh hman tura beisei a ni a. Kawng chhuat tla bal helna tur siam zawh a nih hnuah a rang theih ang bera kawng thawm that hna bawhzui a nih tur thu inkawm hona-ah hian sawi a ni.
Thawhtanni khan he kawng tla bal hian cement phur lirthei lianin a tlakpuia, vanneihthlak takin thi leh hliam erawh an awm lo a ni.
Kawng siam hna hi Multi-Model Project Division a hotute Er. Vanlaldika S.E; Er. Vanlalvuana, E.E leh Er. Ramdinthara, SDO te’n a hmunah an vil bawk.