Rin loh taka an tlawm hnuah Atletico Madrid an tho lehnghal a. Valencia lakah 1-0 a hnehna changin ni 8 kalta a an tlukna atangin an tho.
Diego Simeone pawlte hi Thawhtanni zanah Mestalla Stadium-ah an lenglut a. Second half-ah substitute Antoine Griezmann chuan inkhel a goal awmchhun a khung a. Bench atanga dah luh ni ve tho Thomas Lemar chuan a goal khung tur hi a siamsak.
Valencia hi striker an lakluh tur Edinson Cavani chuan inkhel a en zanah first half a kheltha zawk an ni a. American midfielder kum 19 mi Yunus Musah in goal mawi a khung chu Mouctar Diakhaby foul avangin VAR hmanga endik hnuah pawm a ni lo.
An full-back Thierry Correia chu halftime dawnah hnawhchhuah a ni zet hman a, VAR hmang bawka sut leh a ni.
Inkhel zawhah Simeone chuan, “Inkhel kan kaihruai lo hrim hrim a, mahse goal khungna remchang erawh kan nei hnem. An goalkeeper khan a dang hnem a, 1-0 chauh a nih chhan a ni.” tiin inkhel a thlirlet.