Southampton in tun season Premier League-ah a vawi hnihna atan hnehna an chang a. Goal chhuah hmasa zawka an tan hnuah Chelsea lakah goal hnih khungin 2-1 in an chak.
Blues hi tun season-ah England a league sang berah vawi hnih an tlawmna a ni ve thung a. St. Mary’s Stadium-ah Thomas Tuchel-a pawlte hian nidanga an inkhelh thin angin football an khel lova, an goal nawr a hriam loh rualin khelmual chhungah an khingpuite hmaah an talbuai leh thin.
Saints an ‘comeback’
Tottenham leh Manchester United laka tlawm Saints hian team lian an tum vawi thumna a ni a, an tum angin bul an tan lo.
Chelsea tan mi thar Raheem Sterling chuan minute 23-naah thiam taka ball thunun in an goal hmahruai a khung a. Match hnih atangin goal thum a khung tawh.
Blues in beisei sang takin bul an tan laiin minute nga bak hma an hruai lo. Manchester City atanga an lakluh, tunhnaia kheltha thei tak Romeo Lavia chuan an si phurh sutna goal tha tak mai a khung thuai a. Chelsea in corner atanga ball an pet chhuah that theih loh an tuar.
Saints in goal an neih hnuah an phur sawt a, inkhelah team tha zawk chan an chang tam hle.
Halftime dawnah Romain Perraud chaun Adam Armstrong tan ball siamsakin ani in goal-ah a khung a. A ball pet chu Kalidou Koulibaly chuan dang pialin an goal hnihna a lut.
“Tihbuai kan awlsam lutuk. Inkhelh laiin ball chhuhsak kan awlsam a, kan khingpuiten min chhaihbuai ngun lutuk. Hmachhawn kan awlsam lutuk a, Leeds lakah pawh khan a ni tawh. Hei hi a chhan kan hriat chhuah vat a, kan siamthat vat a tul.” tiin Tuchel chuan inkhel zawhah a sawi.
“Rilru insawrbing lamah kan tha lo leh thin a, inthlahdul lai kan ngah phah. A chhanna kan hriat vat a pawimawh hle.” a ti.
Inkhel dang
Bul tan tha tak kaithar club Fulham in hnehna an chang ve bawk a. 2-1 in Brighton an hneh.
Craven Cottage-ah kum 27 mi an striker rinrawl Aleksandar Mitrovic chuan goal hmasa zawk khungin Lewis Dunk own goal an nei bawk a. Serbia striker Mitrovic hian Fulham tana a goal 100-na niin tun season-ah league match vawi nga atangin goal nga a khung tawh.