Hachhek bialtu MLA Lalrindika Ralte chuan thiamna hmang tangkai turin hna lakna reng reng a dikin a thianghlim tur a nih thu a sawi.
Nilainia MZP Headquarters, Zawlnuam-in zirlai hlawhtlinna chang tharte chawimawina hun, Zawlnuam College Multipurpose Hall-a an buatsaihah bialtu MLA Lalrindika Ralte hi khuallian niin a hman pui a. Thu sawiin, “Thiamna hi a nih dan ang taka hman tangkai a nih theih nan hna lakna reng reng a dikin a thianghlim tur a ni,” a ti.
“Kan ram leh hnam leh thalaite nun tihchhiat vek pawh pawiti lo khawpa mahni hmasial kan awm thin hi a pawi ka ti. Hna kan la dawn a nih chuan thiamna hi teh nan kan hmang tur a ni,” tia sawiin Lalrindika Ralte hian, hna laknaa duhsak zawngte insawipui chin fo thin hi tehna chhe bera a ngaih thu a sawi.
Ram leh hnam kal zel dan tur chu thalaite kutah a awm tih sawiin, “Kan ram leh hnam hmalam hun hi keimahni ngei hian kan ngaihtuah tur a ni; midang phutchhuah tur an awm chuang lo. Future neitu chu keimahni hi kan ni. |halaite hian kan ram leh hnam hi ‘in ta a ni’ tih in hriatchian a ngai takzet a ni,” a ti a; mi dik lo leh ram leh hnam tan pawha rinawm lote pawh hmachhawn ngam lo a, an do ngam lo a nih chuan he hnam hi hnam ropuia chhiar theih a nih a rin loh thu a sawi bawk.
Hachhek bialtu MLA Lalrindika Ralte hian zirlai hlawhtling tharte hnenah lawmpuina thilpek a hlan nghal a ni.