Zirtawpni khan Prime Minister Narendra Modi chuan India-in ram dang puihna tel lova aircraft carrier a sual chhuah hmasak ber, INS Vikrant chu Kerala-ah Indian Navy hman turin a hlan.
Thlawhna phur thei lawng lian hi kum 13 chhung zet sak a ni.
Tonne 45,000 zeta rit, Vikrant hi INS (Indian Naval Ship)-ah tel sa a ni a, dan angin Modi-a hian sipai kutah a hlan a ni.
Lawng lian hi metre 262 (860ft)-a sei, metre 60 (197ft)-a sang niin India-in ama puala hetiang lawng a duan leh a sak hmasak ber a ni a. Indo thlawhna leh helicopter 20 phur thei tur a ni.
India hian aircraft carrier dang, INS Vikramaditya a nei sa mek a, hei pawh hian thlawhna 30 chuang a phur thei a. UK Royal Navy-in an hman lai, HMS Queen Elizabeth chuan thlawhna 40 chuang phur theiin US Navy-in an hman, Nimitz class carrier an tihte hi thlawhna 60 chuang phur thei a ni ve thung.
Vikrant hi Rs. tluklehdingawn 200 man vel zet a ni a, kum 2017 daih tawha navy hnena hlan tura ruahman tawh kha a ni a; mahse, a sak thawh hnihna chu tihkhawtlai a nih avangin a tlai ta duai a ni.
Hman theih hun tlai deuh mah se he lawng lian a nei ta hi India tan chhinchhiahtlak leh lawmawm a ni a, ram tlem tê, mahni kutkawih ngeia hetiang sa thei zingah a tel ve ta tihna a ni.
A hminga ‘Vikrant’ (huaisenna) tih hi a hlu hle bawk a, India-in aircraft carrier a neih hmasak ber, UK hnena atanga a lei, kum 1961 atanga a hman pawh kha hetiang hming tho hi puttir a ni a. INS Vikrant hmasa zawk hi ramin a chhuangin sipaiten beihpui an thlakna hrang hrangah a thawhhlawk hle a, heng zingah hian kum 1971-a Pakistan nena an indo pawh kha a tel a; kum 1997 khan chawlh hahdamtir a ni.
Vikrant thar hi hman tak tak a nih hunah chuan India leh ram dang tuipuiah a chetla vel dawn a, tuipuia hman chi hmanrua, destroyer leh tuihnuailawngte nen an thawk chhuak thin dawn a ni.