Lirthei dan bawhchhiaten dan hmasa aia sum tam zawk an chawi tawhna tur, The Motor Vehicle (Amendment) Act, 2019 chu nimin atang khan Mizoramah hman tan a ni ta a, dan thar hman niah Aizawl khawpui chhungah lirthei tlan chhuak a tlem hle.
The Zozam Times-in Aizawl khawpui chhung a fan kualnaah kawngpui dungte chu a thawlin, traffic jam-na thinte pawh a thawl hle a ni.
Hemi chungchanga zawhna chhangin Aizawl Traffic Police hotute chuan, “Zing lam office leh sikul kai hunah erawh dan pangngaiin traffic a tawt a; mahse, chhun lamah erawh ni dang ngaihtuah chuan thawl tak a ni,” an ti.
Traffic Police hotute chuan dan thara sum chawi tur zat ang chu dan bawhchhiate chawitir nghal an nih thu an sawi a, lirthei tlan chhuak tlem mah se dan bawhchhia an man zat erawh a hma ni nen khaikhinin a tlem hran lo tih an sawi.
Tar lan tawh thin angin Mizoramah The Motor Vehicle (Amendment) Act, 2019 hman a nih dawn avangin August 22 vel atang khan lirthei document leh driving licence fel lo tihfel tum an tam thin hle a, dan thar hman tan ni niminah pawh Aizawl District Transport office-ah leh district danga transport office-ah te pawh lirthei document leh driving licence fel lo tihfel tum thahnem tak awmin, an la inhnawhkhawm nasa hle.
Lirthei khu endikna hmun Aizawl bik ah erawh mipui inhnawhkhawm an tlem deuh thung a, hei hi a chhan chu nimin bikah booking tihthar a rem loh vang nia thudawn a ni.
The Motor Vehicle (Amendment) Act, 2019 hnuaiah chuan dan bawhchhiaten sum an chawi tur chu a tam hle a, dan hluia licence tel loa lirthei khalhin Rs 1,000 an chawi thin kha Rs 5,000 an chawi tawh dawn a, heng bakah dan tesep hrang hranga sum chawi tur pawh a let aia tam fein a pung tawh dawn a ni.