Aizawl: July 23, 2022-a chin hriat loha bo, Kawrthah Hmar veng mi, Sadam Lalthangliana (31) s/o Lalhmuchhuaka ruang chu Thawhlehni zan khan Ngiau luiah hmuh a ni.
Kawrthah atanga thudawn danin Sadam Lalthangliana hi tawngtheilo a ni a, July 23, 2022 zana a chhuak chu chin hriat lohin a bo a, a tuk Pathianniah a chhungten an zawng a, July 25, 2022 atangin Kawrthah North YMA hmalaknain zawn a nih hnuah Taitesena Group YMA hmalaknain zawn zui a ni a; ni sarih chhung zawn a nih hnu pawha hmuh a nih tak loh avangin a thawmhnaw an hmuhnaah hunserh hmangin a nawlpuia zawn tihtawp a ni.
Thawhlehni zan khan Tuidam mi pahnih, chakai chhita kal chuan ruang chhe tawh tak an hmu a, nimin khan enfiah a ni a, a Puma jamper hak leh a towel atangin a chhungte chuan Sadam-a ngei a ni tih an nemnghet a. A ruang hi nimin khan lain vawiin chhun dar 12-ah vui a ni ang.