Aizawl: ZPM Leader Lalduhoma’n, “MNF sorkar chu an intiam ang ngeiin cheng nuai thum hi mipuite hnenah an sem ngei tur a ni,” a ti.
Dampa bial danga fehchhuak ZPM Lalduhoma hian Lallen leh W. Phaileng bakah Rawpuichhip tlawha vantlang inkhawm an buatsaih thu a sawi a. “Kum 2018 inthlan dawna cheng nuai thum leh a aia tam sem min tiamtuten an sorkar atanga kum linaah cheng singhnih sangnga a thuin min sem mek a, nuai thum sem min tiam a, cheng nuai thum hi mipuite hnenah an sem ngei tur a ni,” a ti.
Lalduhoma hian tihhlawhlin leh theih loh tur hmanga mipuite bum chunga ram kaihhruai hi tum tur a nih loh thu a sawi a. “Intiamna chu intiamna a ni a, chhung tin hnena cheng nuai thum sem hi mipuite hnena an intiamna, mipuite laka an bat a ni,” tia sawiin, tuna an kal dan, kum li dana Rs 25,000 inpek tum hian awmzia a nei lo a, hetiang a nih chuan cheng nuai thum dawng tur chuan kum 48 chhung zet a ngai dawn niin a sawi.
ZPM leader hian Mizoram hi India rama state pachhe berte mi a nih thu sawiin, sorkar kum kal mek kum 2022-2023-a Mizoram budget pum pui Rs. vaibelchhe 14,008.15 atanga Mizoram thawh ve chu Rs. vaibelchhe 1,637.73 (za zela 11.69) chauh a nih thu sawiin, “Hetiang hi kan dinhmun a nih lai a, sem policy hmanga inawih nun tum party-te hi mipuiten kan hnawl ngam a hun tawh. Cheng nuai thum sem tur hian kan budget hian a daih lo hrim hrim a, chutiang chu kan dinhmun a ni tih hrereng chungin rorelna fawng chelh duh luatah mipuite min bum hi pawi an ti lo a ni,” a ti.
ZPM a sorkar chuan hna hmasaah inrenchemna kalpui a nih tur thu leh state sum thawhchhuah tipung turin nasa takin beihpui a thlak dawn niin a sawi bawk.