- Ruata
Passenger vehicle siamtu company hrang hrangte pawhin hrileng a ziaawm hnuah an lirthei hralh a tha chho zel a, August thlaah pawh hian an che tha viau a ni. Tun tumah hian passenger vehicle siamtu company zinga a hralh tam zual te kan enho dawn a, thla hmasa khan Maruti Suzuki chuan lirthei an hralh tam ber a, an ni hi hralh tam lama hmahruaitu ni reng an ni.
Maruti Suzuki hian lirthei 1,34,166 ngawt mai August thla chhung khan an hralh a, nikum August thla khan lirthei 1,03,187 hralhin hei hi an khum chiang khawp mai a. Nikum nena khaikhina a punna hi zaa 30.02 lai niin tunah hian passenger vehicle market lamah hian an market share chu zaa 40.87 a ni mek a ni.
Hyundai chuan 2-na dinhmun an hauh a, August thla chhung khan lirthei 49,510 an hralh a, Maruti Suzuki in lirthei an hralh zat nena khaikhin chuan pakhatna leh pahnih hi a inthlau hle a ni. Nikum August thla khan Hyundai hian lirthei 46,866 an hralh a, nikum aia an hralh zat a punna hi zaa 5.4 a ni a, market lama lirthei zaa 15.08 hi Hyundai lirthei a ni ve thung a ni.
3-na Tata Motors lirthei hralh zat hi nikum nena khaikhin chuan a pung nasa em em a, hemi thlaah hian hlawhtlinna ropui tak an chang a ni. Thla hmasa khan Tata Motors hian lirthei 47,166 an hralh a, nikuma August thlaa an hralh zat, lirthei 28,018 nena khaikhin chuan a punna hi 68.34 lai mai a ni a, nikum nena khaikhin hian a punna hi anmahni ro roah chuan a sang hle a ni. Tunah hia market share zaa 14.37 an nei mek a ni.
Mahindra and Kia te hi a indawt dan hian 4-na leh 5-na an ni a. A indawt dan bawk hian market share an neih zat hi 9.09% leh 6.80% te a ni. Mahindra hian thla hmasa khan lirthei 29,852 hralhin khan lirthei 15,973 an hralh a, an ni pawh hi a punna a sang em em a, zaa 86.89 lai a ni. 5-na Kia hian lirthei 22,322 hralhin nikum August thla khan lirthei 16,750 an hralh a, a punna hi zaa 33.27 a ni.
Toyota chuan 6-na dinhmun hauhin thla hmasa khan lirthei 14,959 an hralh a, nikum August-ah chuan lirthei 12,772 an hralh thung a, a punna hi zaa 4.56 a ni. 7-na Honda chuan thla hmasa khan lirthei 7,769 an hralh a, nikum August-ah khan lirthei 11,177 hralhin lirthei hralh zat hi zaa 30.49 in a tlahniam a ni.
8-na Renault pawh an lirthei hralh zat hi nikum nena khaikhin chuan a tlahniam a. Nikum August thla khan lirthei 11,177 tho hralh vein kumin August thlaah chuan 7,012 an hralh a, an lirthei hralh zat tlakhniamna hi zaa 27 a ni. 9-na Skoda chuan thla hmasa khan lirthei 4,222 an hralh a, nikum khan 3,829 hralhin zaa 10.26 in an hralh zat hi a pung a ni. 10-na dinhmun hauhtu MG chuan lirthei 3,823 hralhin an lirthei hralhzat hi nikum August thla nena khaikhin chuan zaa 11.40 in a tlahniam a ni.