- Ruata
South Korea company Hyundai chuan an sports version lirthei bik, N Line huangchhungah Venue an tichhuak thar leh ta a. He model bik hi variant hnih – N6 leh N8 te a awm dawn a, a indawt dan hian Rs Nuai 12.16 leh Rs Nuai 13.15 man te a a ni dawn a, hei hi ex-showroom, Delhi man a ni.
Hyundai Venue hi subcompact SUV hralh kal leh mawi tak, changkang bawk si a ni a. Tuna a chhuak thar, Hyundai-in an chhuanvawr, an N Line huanga a rawn awm thar ve tur hian he lirthei leitu tam tak a hip belh beisei a ni a. N Line lirthei ho hi sawi tawh angin sports lam rawngkaia an lirthei chhuak sa Hyundai in an tihdanglam a ni a. Design leh a riah te, a kentel hrang hrangah te a danglam bik dawn a ni. Tuna Venue N Line chhuak thar hi Kia Sonet X Line leh tlangzarh mai tawh tur Mahindra XUV300 Sportz te nen a inel tawk dawn viaua ngaih a ni.
Design
A pawnlamah hian Hyundai Venue N Line hi sporty red accents with red inserts a chei a ni a, hei hi a roof rail leh brake caliper-ah te kan hmu a ni. Hei bakah hian dark chrome front grille, ‘N Line’ badging awm tel te, side skirt thar lian zawk te, splitter bakah a hnung leh hma spoiler te kan hmu a, hei hi a ti sports tu tur a ni. Tuna chhuak mek Venue-a kan hmuh loh R16 diamond cut alloy wheel, N branding awm tel bawk chu he N Line Venue-ah hian a awm bawk a. ‘N Line’ badge hi a hma fender leh a tailgate-ah te a chuang bawk a ni.
A rawng
Hyundai Venue N-Line hi dual-tone (rawng chi hnih inchawhpawlh) rawng chi 3 – Thunder Blue with Black roof, Polar White with Black roof leh Shadow Grey with Black roof bakah monotone (rawng chi khat hlang) rawng chi hnih – Polar White leh Shadow Grey te a awm a ni.
A chhunglam
A chhunglam hi tuna chhuak mek Venue nen danglamna a tam lo a. All-black interior theme (a chhung rawng dum) a nei ang a, hei hi ti sports lam rawngkai turin rawng sena chei (red accent) dashboard, central console leh gear knob te a nei dawn a ni. Hei bakah hian Venue N Line hian N-spec steering wheel with paddle shifters a nei tel dawn bawk a. Hei hi formula 1 car leh tunhnai lirthei chhuak hrang hranga kan hmuh ang, a steering wheel hnunga kut lehlam lehlama a gear thlakna han kawih mai tur ang hi a ni.
Ken tel hrang hrang
Hyundai Venue N Line hian kentel tha tak tak a nei a, heng zingah hian 8-inch touchscreen infotainment system with wireless Apple CarPlay & Android Auto connectivity, Bose sound system, BlueLink connected car technology leh Home to car (H2C) with Alexa & Google Voice Assistant te a tel dawn a. Hei bakah hian 4-way powered driver seat, electric sunroof, auto AC control, puddle lamp with red ambient lighting leh thildang dang a nei bawk a ni.
A khawl leh thildang
A khawl lamah chuan Venue N Line hian 1.0L GDi turbo petrol khawl a hmang dawn a, hei hian 7-speed DCT automatic gearbox a kengtel a ni. He khawl hian 118bhp power leh 172Nm torque te a pechhuak thei dawn a, a lirthei khalhtu tana khalh nuam leh chak tha bawk si a ni dawn a. A suspension hi sports set up a ni dawn a, a lirthei ri pawh hi sports car ri angin a ri dawn bawk a ni.
Himna hmanrua
Hyundai Venue N Line hian himna hmanraw tha tak tak 30 chuang a nei dawn a. Heng zingah hian airbag paruk, hill hold assist, rear parking sensor, vehicle stability management system, electronic stability control, tyre pressure monitoring system, Isofix child seat mounts, electronic brakeforce distribution (EBD) leh antilock braking system (ABS) te a tel ang..