Raltlante chhawmdawl kawngah sorkar a chak a tul
Kan thenawm Myanmar ram buainain reh lam a la pan thei lo a, an sipaite leh mipuiin sipai an dinte nasa lehzualin an inkap reng a. Hmun thenkhatah phei chuan awmna tur awm leh chuang lo khawpin khaw intihchhhiatsakna a thleng nasa; mipui tam tak mangangin, an sahimna zawngin an la tlanchhe ruih ruih reng a ni.
Kan thenawm mai a nih avangin Mizoramah ngei pawh kan zofa unaupuite nasa takin an rawn tlanchhia a, nu nau leh tar chak lo zawk thlengin an sahimna zawnga an tlanchhiat a ngai si. Ramri depa khaw awmte an hahin, tuamhlawm hna an thawk nasa hle tawh a ni.
Hetiang hi kan dinhmun a ni tawh a, sorkar bawk hi hmachhuan loh theih a ni si lo. Raltlante tuamhlawm hna hi nasa zawka a thawh a, sorkar anga tih a rem lohnaah pawh tlawmngai pawl hrang hrangte a puih nasat a ngai tawh khawp mai. Ramri depa khawtlang hruaitute leh mipuite hian theihtawp an chhuah a, an tha chaknain a tlin loh hun erawh hi chu a awm ngei dawn. Sorkar hian ruahmanna siampui thuai thuai thei se a tha hle.
Central sorkar lah chuan Mizoram sorkar atanga puih an dilna lah a chhang tha duh lo hle nia sawi a ni a, tum engemaw zat sorkar laipuiah chhawmdawlna dilsak a, anni tanpui tura ke pen tura an ngenna lah thehmeh ang hmiah a la ni si. Kan unaute mangangin an rawn tlanchhe ruih ruih a nih laia muangchan chu hun lo ve tak a ni. Mizoram sorkar hian sorkar laipui hi a hlau lo tak tak a nih chuan raltlante buaipui tura ke a pen chak zual sauh sauh hi a ngai tawh hle mai.
Vawiinah pawh tam tak an rawn lut ang, an la rawn luh belh zel dawn. Kan unaute hi kan thlahthlam ngawt a thiang lo. Tlawmngai pawl hrang hrangte pawh hian nasa lehzual a ke an pen a, ramri hnaih khuate an tanpui a, an mamawh an ngaihtuahsak zual hi a ngai. Kan unau raltlante hian kan ramah himna hmu se, sorkar pawhin chet lak tichak zual mawlh teh se.