Mizoram Legislative Assembly pariatna thutkhawm vawi 10-na neih mekah speaker hluiin zawhna pakhat an chai rei lutuk thin thu tihtawp a tul nia a hriat thu a sawi a, senior MLA Lalduhoma’n a thlawp bawk.
Assembly session neih a nih hian bul an tan, chawhma dar 10:30 atanga dar 11:30 inkar, darkar khat chhung zawhna leh chhanna hun hman thin a ni a, zawhna pakhatah hun rei tak hman thin a nih avangin zawhna chhan hman loh thahnem tak a awm phah thin.
September 7, 2022-a thutkhawm neihah zawhna hmasa berah Congress member C Ngunlianchunga’n Lawngtlaia Residential Sport School chungchang chu Sport Minister Robert Romawia Royte a zawt a, zawhna neitu hian a zawh belh bakah ZLP member C Lalsawivunga leh MNF member pahnih – Lawmawma Tochhawng leh H Biakzaua ten an zawh belh a, a chhanna nen darkar chanve zet hun hman a ni.
He zawhna bika hun hman a nih lai ngei hian thutkhawm kaihruaitu, Deputy Speaker Er Lalrinawma chuan zawtna zawttu leh a chhangtute chu sawi kual duah lo turin a hrilh hlawm a, ngenna hi a zawttu leh a chhangtu lamin an zawm lem lo.
Hemi chungchangah hian senior MLA pahnihten member-te chu insum deuh tawh turin an ngen a, deputy speaker-in phalna a pek angin speaker hlui, Minister Lalchamliana chuan house kalphung sawiin, zawhna pakhat an chai rei lutuk thin chu an tihtawp a ngai a tih thu leh chairman pawh an khawng deuh a tul nia a hriat thu a sawi.
Lalchamliana chuan, “Zawhna siamtuin zawhna a siam a, a zawh belhna leh member dangin zawhna chhunga an zawh belhna pawh hi a awm ka ti a, zawhna nena inzawm lo ti chung renga zawh belhte hi chu tha ka ti lo. Kan minister leh kei ngei pawhin ka lo ching thei a, debate ang maia chipchiar lutuka sawi hi a tul lo,” a ti.
Speaker hlui chuan tum khat session an neihah zawhna pariat an lak hman thu a sawi a, “Chu chu a hlawk ka ti a, tangkai pawh ka ti, vawiinah erawh zawhna pathum kan la tawk a, a tawp bera zawhna phei chu hun pek belhah minister-in a chhang zo hram,” a ti a, zawhna pakhat chai rei lutuk chu chairman-in emaw, minister pakhatin emaw a tihreh theih a ni lo a, member zawng zawng tanrualna tur thil a nih thu a sawi.
Nimina zawhna leh chhanna huna zawhna hnuhnung ber chu CLP Leader Zodintluanga Ralte-in BADP sum hmuh chungchanga RD Minister Lalruatkima a zawhna a ni a, zawtna neitu hian a zawh belh bakah MNF member L Thangmawia’n a zawt belh bawk a, zawhna an zawh zawh hmain hun a tawp a, chairman-in member-te remtihna a lak hnuah minister hian hun pek belhah zawhna hi a chhang hman chauh a ni.