Public works department changtu, Chief Minister Zoramthanga chuan Mizoram hmun hrang hranga kawng laitu, NHIDCL-te chu leivung an paih vanga environment an tihchhiatah zangnadawmna pe turin an nawr tih a sawi.
Nimina Assembly Session-a ZPM Legislature Party member VL Zaithanzama zawhna leh member dangte zawh belhna chhangin PWD minister chuan Mizoram sorkar kuta awm ni lo, NHIDCL-ten kawng an laih chungchangah an innawr nasat thu sawiin, leivung an paihnain a tihchhiatte-ah zangnadawmna ti hram tur an nawr thu leh anni lam pawhin a theih ang chin chin chu tih tuma hma an lak thu a sawi.
Zorama chuan Mizoram chhunga kawngpui sial hna thawh mek Mizoram PWD-in a kalpuiahte leivung paihna tur hmun ruat bik a ni loh thu sawiin, contractor leh ram neitute inbiak remna atangin leivung paihna tur ruahmanna siam thin a nih thu a sawi a; Mizoram sorkar hnuaia contractor an ni emaw, NHIDCL an ni emaw kawng laihin environment a tihchhiat lohna tura theihtawp an chhuah tur thu a sawi.
PWD changtu chuan Aizawl leh Lunglei inkar kawng chhia chu a bul thut atanga enfiah a tul thu a sawi a, “Aizawl -Thenzawl – Lunglei (ATL) Road chhungah Tlawng atanga Pukpui inkar chho chu sorkar hmasain PCC-in an siam a, eng a an theih lo va, keinin kan an han ti ve leh a, eng a ang theih chuang lo,” a ti a; helai hmuh bik hi beihpui deuh taka tih tuma department-in hma a lak thu a sawi.