Lallawmawma nen semifinal-a intawng turin Lalruatmawia’n Lalrohlua Pautu a hneh a, Thawhlehni zan Mizoram Labour Link LPS Pro Fight lightweight quarterfinal inhnek dangah Abednego VL Dinpuia’n C Lalfakawma a hneh bawk.
LPS Arena, Falkland-ah Chhiahtlang fighter Ruatmawia’n round li an inhnek chhungin Kanan Veng rawlthar, Rohlua a nawr tluan zak a, round tin la vekin semifinal a lut.
Kum 23 mi, Ruatmawia hian Zirtawpni zan semifinal-ah seed sang ber, Tuipui boxer Lawmawma a hmachhawn zui a ngai dawn a, an pahnih hian nikum khan Mega Fight-ah intawng tawhin Chhiahtlang tlangval a chak.
Thahrui leh tharum nei tha, Ruatmawia’n thiamna lamah hma a sawn tih lantir chhunzawmin chiang tak takin a bitum a hnek fuh a, a ding leh veia a hnek chhuahin awmzia a nei a, inveng chungin tawn hriat tlachham, Rohlu a tawlh kual tluan a ni.
Kanan Veng rawlthar hian lo bei let mah se a hnek let hneh lo hle a, tuar hnem hle chungin thahrui fei tak a nei tih lantir a, a ding tluan a ni.
Light quarterfinal inhnek dangah Sairang Sihhmui rawlthar, Abednego-a’n thiamna hmangin Phuaibuang fighter Fakawma a thunun a, judge pathum point pekah 39-37, 40-36, 40-36-in a chak a. Kum 18 mi hian dik leh dak takin a hnek fuh fo a, Orient Goldsmith Fighter of the Night-a thlan a ni.
A tir atanga khel, kum 22 mi, Fakawma’n vawi li hnehna chang zawn hmanin a inlan hnuhnun berah seed pek zinga mi, New Diakkawn Kolasib boxer Lalramdinsanga a knockout a, tharum a ngah bakah hnek a tuar thei a, a kutthlak a nat tel bawk avangin a vawi khat nan Pro Fight quarterfinal lut mah se seeded boxer dang, Sairang Sihhmui rawlthar lakah chet a harsat tluan a, bei ngawrh viau chungin a hnek fuh thei lo.
Dinpuia’n vawi thum hnek fuh zawn chang nei ve thungin a hman thiam, a ding lama a hnek fo bakah a vei lamin a vai fuh hnem a, langsar takin a chak a ni.
Middle quarterfinal-ah Bawngkawn West rawlthar, Samuel Zadeng chuan hamthatna a neih thiam takin a hmang a, Lunglei Salem Veng boxer Franky H Vanlalruatpuia lakah round li la vekin unanimous decision-in a chak.
Feet 6 leh inchi khata sang, Samuel-a hian a ban phak atangin a chhaih a, amah aia inchi thuma hniam Ruatpuia’n a hnek phak lo a, hnek fuh tuma a nawr laiin a lo hnek a, an inbeih chhung zawngin Lunglei Salem Veng tlangvalin mumal taka hnek fuh a nei mang lo.
Samuel-a’n hnek fuh nei tam bik lo mah se, a hman thiam a vei lama a hnek fuh zauh zauh chhawrin Pro Fight-a a tel vawi khatnaah semifinal a lut a ni.
Welter-ah zirna avangin Bungkawn tlangval, Vanlalnghaka’n a khel zawm thei lo va, Champhai Vengthar boxer Lalremruatpuia’n hahdam tamin semifinal a lut a, Zirtawpni zanah seed sang ber HC Lalramfela nen an inhmachhawn ang.