Aizawl : Aizawla motor lut hmasaber C Rochhinga (L) tu leh fa te lehkhabu buatsaih ‘Aizawla motor lut hmasaber’ tih chu Inrinni khan Dy. Chief Minister Tawnluia’n a tlangzarh.
Dy. CM Tawnluia chuan Aizawla motor khalh luttu hmasa C. Rochhinga chu pa tumruh, hmathlir thui tak nei, taima, huaisen leh mahni inrintawkna nei ngah mi nia sawiin, a chanchin chhiartute tan zirchhuah tur tam tak a awm thu a sawi.
C Rochhinga chu Mizo pa tlawmngai, hawihhawm leh aia upate zah thiam, Mizo hnam rilru pu mi nia sawiin, Tawnluia chuan “Mizo hnam changkanna leh hmasawnna atana ngaihtuahna seng thin mi a ni”, a ti a. A tu leh fa ten tunlai thangthar te chhiar theih tura a chanchin a bu-a an buatsaih chu lawmawm a tih thu sawiin, a chhiartu ten hlawkna engemawtal an chhar chhuah ngei a beisei thu a sawi bawk.
Aizawla motor khalhluttu hmasa C. Rochhinga hi kum 1919 January-ah Sialhau khua-ah a piang a. Kum 1942, September ni 10-a Sairang atanga Aizawla Truck (Chevrolet 15 CWT) a khalhluh chu Aizawla motor khalhluh hmasakber a ni.