Player 10 a an khelh hnuah Italy champion lai AC Milan in chakna goal an khung thei a. Tun season-ah away inkhela hnehna an chan hmasak ber ni turin 2-1 in Sampdoria an hneh.
Stadio Luigi Ferraris-ah tun season a tlawm la nei lo Milan hian goal an khung nghal thuai a. Forward rinrawl Rafael Leao chuan forward Junior Messias goal khung tur a siamsak tha hle.
Kum 23 mi hian tun season-ah midang goal khung tur a siamsak vawi thumna a ni a. Kuminah Serie A bikah goal leh assist 20 a nei tawh tihna a ni.
Sampdoria in an chhanglet ve nghal teuh a, midfielder Filip Djuricic chuan goal bar a pet per a. Lehlamah Milan tana Charles De Ketelaere pawm a ni lo.
Second half tan tirah Leao hian defender Alex Ferrari lu a pet avangin yellow card a hmu nawn a, hnawhchhuah niin Milan an tlawm zawk.
Sampdoria in an tam zawk remchangah an la a, Serbia midfielder Djuricic-a’n goal a khung. Mahse an midfielder Gonzalo Villar hand ball avangin penalty an chawi a. Hei hi French striker Olivier Giroud-a’n goal-ah a khung.
Milan midfielder Sandro Tonali chuan, “Lehlamin yellow card panga an hmu a, an thil tum a hriat hle. Mahse hetiang chung pawha kan chak thei hian thui tak kan kal thei tih a ti lang. Kan that ber lai kan la thleng lo, mahse kan tha tawh viau tho.” tiin inkhel zawhah a sawi.
Inrinni zan inkhel dangah Napoli in minute 89-naah goal an khung a. 1-0 a Spezia hnehin league-ah an la sang ber.
Stadio Diego Armando Maradona-ah Partenopei tan Giacomo Raspadori chuan minute 89-naah goal a khung a. Tun season-ah vawi li an chakna chiah a ni ve bawk.