Cental YMA-in ruihhlo do tura a din, Central Anti Drug Squad (CADS)-in heroin hawng nga, Rs nuai 5 man hu an man tawh.
October 15, 2019-a ruihhlo dotu, Supply Reduction Service (SRS) tihtawp a nih hnu kum hnih leh a chanve hnuah Central YMA-in CADS a din thar leh a, CADS member lawm luh an nih hnu, September 9, 2022 atang khan Aizawl khawpuiah ruihhlo dap beihpui an thlak nghal.
The Zozam Times zawhna chhangin CADS hruaitute chuan CADS bul tan ni, Zirtawpni atanga Pathianni thleng, ni thum chhungin heroin hawng nga an man tawh tih an sawi.
Heroin hawng khat hi gram 15 bawr vel a ni a, tual chhung rate-ah hawng khat hi Rs 12,000 atanga Rs 15,000 inkara hralh thin a ni a, heroin an man hi Rs nuai 5 chuang man hu a ni.
CADS member lawm luhna hun, September 9, 2022-a neih a nih khan Central YMA hruaituten ruihhlo do hna an thawhna kawngah police leh Excise & Narcotics department-ten an uap thin dawn tih an sawi.
Ni thum chhunga ruihhlo dap hna an thawh tawh chhung hian police leh excise force-te chu an bulah dah an la ni lo tih CADS hruaitute chuan an sawi a, hetihlai hian heroin hawng nga an manna kawngah erawh excise force-te nen an thawkho tih an sawi thung.
CADS-ah hian Aizawl khawpui chhung YMA branch 100 atangin member 54 an awm a, ni tin chhun dar 12 atangin office atana an hman, Central YMA Office-ah an thleng khawm thin.
An duty dan chungchang zawhna chhangin, “Ni khatah mi chuti zat chu duty tur kan inti lo a, member 54 atang khan a hman hman duty turin kan chhuak a, chhun dar 12 atangin Zawlbuk hi kan hawng tan a, kan member thenkhat chuan ruihhlo kan manna hmunahte an rawn kal mai thin,” an ti.
SRS an kalpui vung lai khan ruihhlo ngawlvei leh a zuar an mante counselling petu, Synod atangin councellor an nei thin a, tuna CADS an din thar leh hnuah pawh hian Synod-in counsellor a pe leh dawn tih CADS hruaitute chuan an sawi.
YMA hian kum 2004 atang khan ruihhlo a do tan a, December 4, 2004-ah Secretariat Complex (Raj Bhavan Hmar lam gate) bulah khtihlaia Central YMA president, Lianzuala’n ‘Ruihhlo Do’ kumpuan a hawng a, hemi ni hian Aizawl khawpui chhunga YMA member thahnem takin ruihhlo do beihpui an thlak zui nghal a, SRS pawh hemi kuma din a ni.
SRS hmangin September, 2018 thleng hmalak a ni a, hemi hnu kum 2009-2010 chhungin flying squad dinin ruihhlo an do leh a, kum 2011 atanga August thleng Central Anti Drugs Squad (CADS) hming puin ruihhlo an do chhunzawm leh.
April 15, 2015-ah SRS an din thar leh, October 15, 2019-ah tihtawp leh a ni a; August 5, 2022 zana Central YMA hruaitute uapnaa Aizawla YMA branch OB-te thukhawmin Central YMA hnuaiah ruihhlo do kalpui tha an tih angin CADS hi din thar leh a ni ta a ni.