Aizawl : Tun thla ni 12 thleng khan Lunglei district-ah Myanmar raltlan mi 2112 an awm a. An zinga mi 1062 chu camp-ah awmin, mi 1050 te chu camp pawn lama awm an ni thung.
Lunglei Bawrhsap Pisa-in a chhinchhiah danin Lunglei district-a raltlan 2112 zinga mi 989 te chu mipa niin, hmeichhia 1123 an ni a. An zingah hian naupang, kum 18 hnuailam mi 706 an awm bawk.
Myanmar raltlante hi an camp-ah leh an awmna hmun dangah te kalchilha COVID19 laka invenna pek thin an ni a. An zinga COVID19 vaccine la thei mi 1429 zingah dose khatna la tawh 721 awmin, dose hnihna la mi 429 an awm tawh.
Lunglei district level committee on Myanmar refugees chuan an Chairman, Lunglei Bawrhsap Kulothungan hovin Mizoram district pali – Hnahthial, Lunglei, Lawngtlai leh Siaha-a Myanmar raltlan ten an mamawh hrang hrang an dawn theihna tura hma la mektu NGO – Adventist development & relief agency India (ADRA) leh Mizorama an thawhpui Centre for peace & development (CPD) hmalakna te an thlirho a. He hmalakna hi United Nations High Commissioner for Refugees (UNHCR) hnuaia hmalakna niin, kumin July ni 1 atanga December ni 31 thlenga kalpui tur a ni.
He project hnuaiah hian raltlante mamawh hrang hrang – ei leh in tur, mimal mamawh (hygiene kits – toothbrush, tooshpaste, sahbawn, etc), blanket, bungbel, bedsheet, nau- pang tan education kit (zirlaibu, pen, pencil, schoolbags etc) etc te pek an nih dawn bakah ratlante awmna camp-ah tui connection leh tui dah khawlna tanky te ruahman tum a nih thu sorkar thuchhuahin a tarlang.
ADRA leh CPD thawktute chuan Hnahthial, Lunglei, Lawngtlai leh Siaha district-a raltlan camp-te tlawh chhuak tawhin, dry food kit 8000, Hygiene kit 2500, Dignity kit (undergarments, sanitary napkins) 2500 leh non food item kit (blanket, bungbel, bedsheet etc) 2000 sem chhuak turin an inpuahchah mek a. Heng district palia camp 39-ah naupang infiamna hmun 50 siam tawhin, naupang 2000 hnenah educational kit an pe tawh niin sorkar thuchhuah chuan a tarlang bawk a ni.