COVID variant chi hrang zinga mi, Omicron atanga insiam danglam leha a chi thar chhuak, BA.4.6 tia an sawi chu tun lai hian khawvel hmun hrang hrangah a darh leh mek a, a bikin US leh UK-ah a kai an tam zual.
UK Health Security Agency (UKHSA)-in hri leng chungchanga thu an chhuah thar berah August 14 atanga chhiar tanin hri kai zinga 3.3% chuan BA.4.6 hi an kai a. Tun dinhmunah erawh 9% vel an ni tawh tih an tar lang.
Centers for Disease Control & Prevention pawhin US-ah Covid kai zinga 9% chuangin BA.4.6 hi an kai niin a sawi bawk a. Heng ram pahnih bakah ram dangah pawh kai an awm teuh tawh nia hriat a ni.
BA.4.6 variant hi a hlauhawm em tih leh chiaina tur a ni em tih thui tak hriat theih a la ni lo.
BA.4.6 hi omicron variat, BA.4 an tih atanga piang leh a ni a. BA.4 hi January, 2022-a South Africa-a hmuh hmasak ber kha niin BA.5 variant nen khawvel hmun hrang hrangah a darh rual.
Engtin nge BA.4.6 hi a insiam theih tih chiang taka hriat theih a la ni lo va, variant dang nena inbelhbawma insiam a ni thei tih mi thiamte chuan an sawi a. Hri chi hnih inbelhbawm hi mi pakhatin a ruala a kaiin a insiam thei niin an sawi a ni.
BA.4.6 hi hriat theih chinah chuan BA.4 nen a tlangpuiin a inang a, spike protein tia an sawi, a taksaa zum lawr fir fer, mihring cell-a a inham tanna leh a intihdanglam theihna pawh a la pai a. Hetianga insiam danglamna, R346T tia an sawi hi variant dangah pawh awmin taksa ralveng sipai beitu an ni a, invenna la tawh leh kai mai thei dinhmuna dingte taksaa hri do theihna kha paltlang turin a pui thei a ni.