Union Minister of State Sadhvi Niranjan Jyoti-i’n Mizoram sorkar chu sorkar laipui scheme hrang hrang tihhlawhtlin kawnga che muangah a puh.
Ni thum chama Mizorama zin, Jyoti-i chuan nimin khan SAD, Conference Hall, MINECO, Aizawl-ah chanchinbumite a kawm a, sorkar laipui scheme hrang hrang tihhlawhtlin kawnga Mizoram sorkar a chet muan thu hi a sawi a ni.
Sorkar laipuia Rural Development changtu chuan sorkar laipuiin Pradhan Mantri Awas Yojana (in nei lote tana in sak tanpuina) hnuaiah mi 15,674-te in sakna tur sum a pek chhuah tawh thu a sawi a, “Hetihlai hian in sak zawh tawh chu zaa 40 chauh a ni,” a ti.
He project hi kum 2023-a zawh vek tawh tura tih a nih laia tuna zaa 40 chauh tihpuitlin a la ni chu tha lo a tih thu sawiin, Mizoram sorkar leh he project buaipuitu minister chu project tihpuitlin vek a nih theih nana hma la rang turin a ngen tih a sawi.
Sorkar laipui scheme-a state sorkarin a tum ve tur, 10% chauh ni si chu state thenkhat sorkarin an ngaihthah thin tih union minister chuan a sawi a, “State sorkarte hian an tum ve tur an pe duh lo a nih pawhin sorkar laipui atanga sum an hmuhte erawh dik takin hmang mai thin se,” a ti.
India hmarchhak state hrang hrang ram hruaituten sorkar laipuiah an harsatnate thlenin project an siamte tihhlawhtlinsak tura an ngen thu sawiin, “Project hrang hrang an rawn put luhte hi kan ngai pawimawh em em,” a ti a, sorkar laipuiin sum a thawh tur zaa 90 pek kawngah harsatna a awm ngai loh thu a sawi rualin state sorkarin a tum ve tur a pek that duh tlat loh chuan buaithlakna a awm thin thu a sawi.
Mizoram sorkar flagship programme, SEDP chungchang sawi lang bawkin, “Mizoram sorkar pawh hian sumfai Rs nuai 3 mi harsate hnenah sem a intiam tih ka lo hria a, vawiin thlengin an la sem lo,” a ti.
India ram chhung state thenkhat sorkar zingah an tihhlawhtlin theih loh tur intiam an awm thin tlat chu buaithlak a tih thu a sawi a, Mizoram bakah state dang sorkar sum sem tiamte chungchangte chanchinbumite hmaah hian a sawi a ni.
Union minister chuan sorkar laipui scheme hrang hrang Mizorama an kalpui tawh dante sawi tel bawkin, ni 100 inhlawhna, MGNREGA chu a ngheta inhlawhna ni lo mah se thingtlang miten an chhawr tangkai thu sawiin, MGNREGA hnuaiah Mizoram tan Rs. vaibelchhe 258 ruahman a nih thu leh hei hi state lian lo, Mizoram tan chuan tam tham tak a nih thu a sawi.
Pradhan Mantri Gram Sadak Yojana (PMGSY) hnuaiah Mizoram chhunga kawngpui km 4,442-a thui siamna tur Rs vbc 2,840 vel an sanction tawh thu te, self help group pawh Mizoramah an pung zel a, cluster 7,872 a awm tawh a, chumi atan chuan Rs. vaibelchhe 41 chuang sum pek a nih tawh thute a sawi bawk a ni.