Europa League a an match hmasa berah rin loh taka an tlawm hnuah Manchester United in hnehna an chang a. Moldova club Sheriff Tiraspol tlawhin 2-0 a chakin an haw.
United tan an superstar forward Cristiano Ronaldo chuan tun season a a goal hmasa ber a khung a. Goal a khung loh in sawi a hlawh viau hnuah a mamawh goal a khung thei.
Old Trafford-ah Real Sociedad lakah beisei angin an khel lo. Moldova-ah team tha an luhtir phah. Erik ten Hag-a’n inkhel sawn a nih avangin tunhnaiah ni awl an ngah a, hei vang hian a starting XI pangngai khelhtirin inhliam Marcus Rashford aiah Ronaldo in bul a tan.
First half-ah Christian Eriksen-a ball fing atangin Jadon Sancho chuan goal mawi a khung a. Penalty area chhunga a ball thunun dan a fakawm.
United in inkhel an thunun tha viau a, Sancho-a goal khung belh tur goal line-ah pet chhuah a ngai.
Second half-ah English club in an goal hnihna an khung a. Diogo Dalot chuan penalty hlawhchhuakin Ronaldo-a’n goal-ah a chantir.
Europa League a goal a khung hmasak ber a ni a. Club football-a a goal 700-na tur a khung belh teuh hle bawk.
Inkhel zawhah Man United coach Ten Hag chuan, “Inkhel a awlsam lova, ball min chantir an pawi ti lova, ding khawng tlat a, an thahrui nena min nawr let an tum. Mahse inkhel a kal thui deuh tak hnu khan hma kan sawn.”
“Goal tha tak kan khung bawk a, an tlarhnung kan thiat thei fo a, inkhel kan thunun tha hleah ka ngai.” tiin an inkhel a thlirlet.
Goal khungtute chungchang sawiin, “Ronaldo hian kha goal kha a mamawh. Tun season-ah a khung teuh thin hle a, goal khung hi a tum hle bawk. Goal a khung hi kan lawm a, team pawhin goal khung tur kan tum. Penalty a nih ngat tawh phei chuan Cristiano hian a thelh dawn lo tih kan hria.” tiin a sawi.
England in an hnawl Jadon Sancho chungchang pawh sawi bawkin, “Jadon pawh ka lawmpui a, goal a khung belh zel a, tun season-ah vawi thum khung tawhin pre-season-ah pawh a hriam tha hle tih a lang.”
“Tunah a kheltha a, tun ai pawh hian a la kheltha zawk thei a ni.” a ti.
Inkhel dang
An group inkhel hmasa a an tlawm hnuah AS Roma in hnehna an chang a. 3-0 in
HJK Helsinki an hneh.
Stadio Olimpico-ah mikhual team in minute 14-naah Miro Tenho chu red card avangin an chan a. An tlawm zawk hnuah inkhelh a harsa.
Roma tan Paulo Dybala, Lorenzo Pellegrini leh Andrea Belotti ten goal an khung a. Inkhel zawhah coach Mourinho chuan a striker te chu goal hmaah an hriam zawk a, goal khung hnem zawk an mamawh tih a sawi.