Delhi Chief Minister Arvind Kejriwal chuan Pathianni khan Prime Minister Narendra Modi leh BJP chu beiin Gujarat state-a inthlan lo awm turah chak loh an hlauh avangin AAP chu ei rua puhin tihchhiat an tum niin a sawi.
A vawi khat nana ram puma an party hminga mipui aiawh thlan chhuahte intawhkhawm an huaihawtah Kejriwal chuan Modi-a kaihhruai sorkar chuan an party minister leh hruaitute chu dik lo taka puhin ei ruah a chhalin nawr hniam an tum niin a sawi a, “Hei hi Gujarat-a AAP lar chak tak an pai dam theih loh vang a ni,” a ti.
BJP chu chanchinbute pawh thununah AAP national convener hian a puh a, “Gujarat assembly inthlan hmabak mekah AAP lian zel avangin prime minister advisor Hiren Joshi chuan TV channel neitu leh an editor eng emaw zat chu Gujarat-a AAP chet velna tilang lo turin a vau a ni,” tiin a sawi.
Kejriwal-a’n a puhna chungchang hi PMO-in emaw, Joshi-a emaw hian an la chhang lo.
“Hetianga thil tih hi sim rawh u. Editor-ten Joshi-a hnen atanga message an dawnte an pho chhuah chuan prime minister leh a advisor hian he ramah hian hmel inlan zui tur an nei lo mai thei,” tiin Kejriwal chuan a sawi.
“Gujarat-ah hian sorkar kan siam dawn,” a ti bawk.
Prime minister-in a thlawna thil sem a sawisel thin pawh Kejriwal chuan a chhang a, a thlawna mi thil tihsak chu ram eibar dinhmun tihchhiatna anga chhuah chu a ni lo tih a sawi.
“Mi rinawm lo, ei ru leh phatsantu chauhvin a thlawna thil sem hi an sawisel. Politician-in a thlawna thil semin economy a tichhia nia a ngaih chuan a rilru put hmang a dik lo a ni mai,” a ti.