France rama in sang lawn thin, ‘Spider-Man’ tia an koh chuan a kum 60 tlin pualin Paris khawpuia chhawng 48-a sang in chu invenna engmah tel lovin a lawn chhuak.
Alain Robert hian Défense business district-a Tour TotalEnergies hi hrui leh indawmna dang engmah keng lovin a lawn chhuak a ni.
“Mite hnenah kum 60 nih hi upatna a ni lo tih lantir ka duh a. Sport i la ti thei a, active tak leh thil ropui dang i la ti thei a ni,” tiin Reuters news agency hnenah a sawi.
A chhim a thlen velehah lo man a ni thung nia sawi a ni.
Robert-a hian Tour TotalEnergies hi a hmain vawi tam a lo lawn tawh a. Tun tuma a lawnah hian minute 60 chhung hun a hmang niin news site Defense 92 chuan a tar lang.
“Kum eng emaw zat liam tawhah khan kum 60 ka tlin hunah tower hi ka lawn leh ang tiin ka intiam a, hei hi France-ah kum 60 hi chawlh kum (retirement age) a ni a, hun bi pawimawh niin ka ngai a ni,” a ti.
In sang a lawn chu khawvel pum lum zel tihziaawmna tura beihna tura mi zirtirna atan a ti bawk niin Reuters chuan a tar lang.
Robert-ah hian khawvela in chhawngs ang a lawn kual nasa hle a. A lawn tawh zingah khawvela in sang ber, Dubai-a Burj Khalifa pawh a tel.