Dan lovin Myanmar atangin Mizoramah kuhva rah la phurh luh reng theih mah se a hralhna ber thin, Assam sorkarin Myanmar kuhva raha sumdawnna nasa taka a do avangin he sumdawnna hi a kal tawh rih lo va. Vairengte leh a chhehvela kuhva rah dahkhawmna kudam thenkhatte pawh leitha bakah cement dahkhawmna atan hman tan a ni.
Myanmar atanga kuhva phurh luh tam tak chu Vairengte leh a chhehvela kudamah dahkhawl thin a ni a, chuta tang chuan Assam-ah phur lutin an hralh thin.
Vairengtea khawchhak kuhva hmanga sumdawng thinte chuan Myanmar atangin Mizoramah kuhva a la lut thei reng mah se, Assam sorkarin nasa taka a do avangin Assam lamah a phurh luh theih tawh rih loh niin The Zozam Times an hrilh a. Assam-ah Myanmar kuhva rahte a phurh luh theih tak loh avangin an sumdawnnain a tawrh nasat thu sawiin, “A hralh kawngah harsatna a awm tak avangin kudama kuhva rah kan dah tam zawk chu a tawih chhe tawh a, sum tam tak a luang ral tawh,” an ti.
Kuhva rah dahkhawmna kudam sakna hmun ram chu mi ram luah hawh thin a ni a, kudam neitute chuan ram an luah hawh man an chawi reng si avangin sum an hloh tam tak hmuh let nan kudamte chu leitha dah nana an hman bakah cement dahkhawm nan pawh an hmang tan tawh niin an sawi.
Assam-a Myanmar kuhva hralh a harsat hma chuan sumdawngte hian sorkarah dan ang takin GST chawia way bill fel taka neiin state pawnah an phur chhuak thin niin an sawi a. He sumdawnna hi a hlawk tih an hriat avangin mi tam tak chuan loan an pûk bakah mi mal pawisa an batsak hlawm a, heng mite hian harsatna an tawk nasa hle niin an sawi.
Myanmar kuhvate chu chhum sa te, kheh nawi sa te, a pum tha te a ni hlawm a; Myanmar atanga chawluttuten a pack-na (bag) hran bik an neih avangin chutiang bag-a mi chu Myanmar kuhvaah puhin an mansak ber thin niin an sawi bawk.
Vairengte Police atanga thudawn danin gate paltlang tum leh kawng dang zawha Assam-a Myanmar kuhva phur lutte chu a theih chin chinah an dang niin an sawi a. Ramria kawng laih hrang hrang a tam avang leh zan reia phur chhuak thin an nih tlangpui avangin eng emaw zat chu a tlang thin tho an ring a, mihring tha – headload hmang pawha phur chhuak an awm thin niin an sawi.
Hetihlai hian Kolasib bawrhsapin an district chhunga khawchhak kuhva phurh luh khapna thupek kar kaltaa a chhuah avangin tun hnaiah khawchhak kuhva phurh luh a awm tawh rih lo nia an hriat thu police atanga thudawnna chuan a sawi bawk.