AIZAWL: Congress party-in Sepetember 14-a MNF Legislature Party Secretary L. Thangmawia’n thuthar thehdarhtute kawma April 1, 2019 leh July 14, 2022 inkara nuai 100 chin chung lam bill, treasury-a thehluh ni la laa pek chhuah bill 105 a awm nia a sawi chuan sum harsatna an sawi reng lai pawhin an duhsak zawng contractor-te contract pek leh bill pek kawngah chuan harsatna an tawk lo tih a tichiang zel niin an sawi.
MNF sorkarin COVID chhuanlama suma harsatna a tawh thu a tlangaupui laiin an duhsak zawngte a ruka an lo vur nasatzia a lang chho zel niin Congress party chuan an sawi a. Ni khata treasury-a bill lehlan thei bikte bill belhkhawm pawh Rs. vbc 591 lai nia sawiin MNF party worker leh contractor tam zawkin an hnathawhna bill an lak theih loh lai leh PMGSY contractor tam zawkin bill vaibelchhe 200 chuang an lak theih loh avanga hna an chhunzawm theih loh laiin an duhsak zawngte hna leh bill pek kawngah chuan harsatna an tawk lo tih L. Thangmawia MLA thusawi chuan a tichiang niin an sawi.
MNF party sorkarna hnuaia ni khata bill lehlan thei zinga che thei ber chu SLT Infracon Pvt. Ltd, Silchar nia sawiin, anni hian bill pakua lai an thehluh ni la lain an la nghal thei niin an sawi a. Ratna Infra, Hyderabad leh M/S Bhavya Construction, Silchar pawhin an bill pali ve ve ni khatah an lehlan thei niin an sawi bawk.
Congress party chuan “Pu Zoramthanga fachuam, a vangvat kaipuite ai pawha a duhsak, Kamrul-a pawhin treasury-ah bill pathum a lehlanpui thei,” an ti a, “Hetiang a nih lai hian sorkar hnathawkten tunhma angin a hunah tak hlawh an la thei lo va, sorkarin pension a chhuak mi 1,367-te pawisa a batsak pawh Rs. 2,49,87,07,426 a tling tawh a, GP fund pawh an la hleithei lo,” an ti.
“Kamrul-a leh hnam dang company lianten pawisa an hmuh zung zung theih laiin chhungkaw tina Rs. nuai 3 sem an tiam chu Rs. 25,000-in an sem thei hram a, MNF sorkarah mipui aiin duhsak hlawh zual – Kamrul-a leh mi tlem tête pawimawh zawkzia a tar lang chiang hle,” an ti bawk.