Aizawl : UD&PA Deptt-in Swachh Bharat Mission (Urban) hnuaia Indian Swachhata League denchhena a buatsaih, Youth Rally chu Inrinni khan UD&PA Deptt. changtu, Deputy Chief Minister ni bawk Tawnluia’n Mahatma Gandhi Memorial Statue bul, Zodin Square atangin a vailiam.
Deputy Chief Minister chuan September ni 17 atanga October ni 2 thlengin India ram pumah faina kawnga hmasawnna tura beihpui ‘Swachh Amrit Mahotsav’ hman tur a nih thu a sawi a, hemi hnuaia hmalakna hmasaber ‘Indian Swachhata League’ denchhena Rally chu huaihawt a nih thu a sawi.
Tawnluia chuan Youth Rally-in a tum ber chu India ram khawpui bawlhhlawh awmlohna ‘garbage free city’ a siam a nih thu sawiin, hemi kawngah hian thalaite kaihhruaina a beihpui thlak a nih thu tur thu a sawi a. Mizoram khawpuite fai leh thianghlim taka siam chu mitin mawhphurhna a nih thu sawiin, “chhungkua-ah bul tanin khawtlangah a arh chhuak tur a ni” a ti.
Dy. CM chuan “bawlhhlawh ti tlem tur chuan plastic atanga siam no, fian thleng leh bottle bakah hmankhat daih sarang kan hman loh a pawimawh” a ti a. “Kan chhuahvahnaa puan ip pai kan uar zel te pawh a ngai a ni” a ti bawk.
Faina beihpui atan Aizawl district-ah Aizawl Clean Avengers tia vuahin, team pathum siam a ni a, team 1-na chu Hrangbanna College, NSS te niin, an ni hian Aizawl khawpui chhung leh Sakawrhmuituai tlanga bawlhhlawhte an chhar fai a. Team 2-na Pachhunga University College, NSS ten Muthi Park lam tifaiin, Team 3-na Govt. T. Romana College, Adventure Club-in Lalsavunga Park an tifai bawk.
Lunglei-ah pawh Inrinni vek khan he beihpui hi Lunglei HPC Vice Chairman Lawmawma Tochhawng-in a hawng a. He beihpuiah hian Lunglei district team chu Lunglei legion team tih a ni a, Lunglei khawpuia Children’s Park leh Pukpui Centenary te thianfaiin an hnatlang.
Champhai-ah pawh Inrinni vek khan he beihpui hi Bawrhsap James Lalrinchhana’n a hawng a. Champhai Nature Conservancy (CNC)-in New Champhai atanga Zotlang panna kawngpui dung an tifai a, Govt. Champhai College Green group NSS Unit-in Zotlang leh Mualnuam inkar an tifai bawk.
Lawngtlaiah pawh ISL Youth Rally hi buatsaihin faina beihpui chu an hawng a. Lawngtlai district faina kawnga hma la tura inpe, Lawngtlai Warriors te chu hmun thumah inṭhenin, Lawngtlai khawpui chhunga kawng kama bawlhhlawh ṭawihtheilo (plastic) te an chhar fai a. Hemi ni vek hian Mizorama fai inelna atana inbuatsaihna kal zelah Lai Women Association, New Vengpui Branch; Lairam Isua Krista Baptist Kohhran Ṭhalai Pawl (LIKBKṬP), Shalom, Thingkah leh Ṭhalai Kristian Pawl (ṬKP), Electric Veng Unit te chu veng chhung tifaiin an hnatlang bawk a ni.