Bundesliga champion Bayern Munich in point an hloh leh a. A zawna league inkhel vawi li hnehna an chan lohna ni turin Augsburg lakah rin loh takin 1-0 in an tlawm.
WWK Arena-ah German champion hi inkhelin minute 59-naah goal an chhuah a. Mergim Berisha chuan inkhel a goal awmchhun khungin Bayern coach Julian Nagelsmann-a kovah phurrit a nghah belh.
Augsburg hian Bayern lakah football huaisen an khel ngam a, an khingpuiten chhanletna an nei lo zawk. First half-ah goal-ah vawi sarih ngawt chance tha an nei.
Lehlamah Bayern tan Sadio Mane leh Leroy Sane ten an huntha neih an hloh ve bawk.
Bayern hian league match 87 chhunga goal an khung loh hmasak ber a nih bakah kum 20 hnua a vawikhatna atan league match vawi li-ah chak nei lova an kalna a ni.
Inkhel dangah Borussia Dortmund tan rawlthar striker Youssoufa Moukoko chuan Ruhr valley derby-ah goal awmchhun a khung a. 1-0 a Schalke lakah a team chakpuiin Bundesliga-ah hma an hruai.
Kum 17 mi hian minute 79-naah a goal hi khungin Ruhr derby a goal khung naupang ber a ni a. Hetihlai hian Dortmund lawm erawh kim lovin captain Marco Reus chu inhliam avangin a inkhel zo lo.