Saul ‘Canelo’ Alvarez chuan a khingpui leh elpui hlun tak Gennady Golovkin nena an inkar dahtha turin hnehna a chang a. An inhmachhawn vawi thumnaah round 12 chhung inhnekin chiang takin unanimous decision in a chak.
Las Vegas-ah Pathianni turah champion lai Mexican boxer leh Kazakhstani boxer ten hruihrual chhung an lut a. An intum hmasa pahnih ain Canelo hi chungnung zawkin a super-middleweight champion kawnghren a humhim.
Gennadiy Gennadyevich Golovkin, GGG tia hminglem an vuah nen hian kum 2017 September khan inhmachhawnin an in ‘draw’ a puan a ni tawh a. A kum lehah inhnek lehin inthlau lo takin majority decision in Canelo a chak.
A vawi thumnaah hian round tir lam leh a laihawl zawng Canelo hian nawr na hle in a thunun thei viau a. Ni dang ang lo round tir lamah fimkhur Golovkin-a’n round hnuhnung lamah nawr viau mahse Mexican boxer hi a inveng thiam tawh a. 116-112, 115-113, 115-113 in a chak.
“Fans te hnenah inhnek ropui vawi thum kan hlui a, i hnenah lawmthu ka sawi.” tiin Canelo chuan a chak hnuah a sawi.
GGG chuan, “Bul kan tan dan kha ka tihsual a ni a, ka khingpui ka zirchian chhung kha a rei lutuk. Canelo hi pasaltha ropui a ni a, hei hi hrethiam lo chuan engmah an hre lo.” a ti.