An ramin an tawrh tawha na ber pawl tling typhoon-in Japan a nuai mekah mi maktaduai kaw chuang hmun himah sawn an ni.
Nanmadol tia an sawi super typhoon avang hian mi pahnih thi an awm tawh a, mi 90 dawnin hliam an tuar.
Japan chhim lam kila thliarkar, Kyushu chu Pathianni khan nuaiin ni reilo te hnuah Honshu thliarkar a paltlang leh rin a ni.
Pathianni zan khan mi sang tam tak chu emergency shelter-ah an tawm a, chhungkaw 3,50,000 chuangin power an nei lo.
Inkalpawhna leh sumdawnna a chawl vek a, tui lian leh lei min nasa tak a thleng bawk.
Nanmadol hian darkar khata km 234-a chak thlipui kengin hmun thenkhatah chuan darkar 24 chhungin ruah mm 400 zet a sur bawk.
Rel, lawng leh thlawhna thlawk tur tam tak thulhtir a ni a. Dawr leh sumdawnna tam tak khar niin thil chhe theite ven nan balu ip tiang khawma invenna siam a ni bawk.
Typhoon hi Japan-a an thliarkar chhim ber, Kyusu-a Kagoshima khawpui bul lawkah Pathianni khan khawmual a kai.
Kyushu-a lui chu nasa takin a kuang a luang liam.
State broadcaster NHK chuan mi pakhat chu a chuanna tui lianin a lak avangin a thi niin a tar lang a, lei minin mi pakhat a chhilh bawk a. Mi pakhat chin hriat loh a awm bawk a, mi 87-in hliam an tuar bawk.
Video thehdarh thenkhatah chuan in chung hawk leh khawlaia thil tar chhia a tam hle.
Nanmadol hian khawchhak lam her hretin Japan thliarkar lian ber, Honshu chu Nilaini hian a thlen rin a ni a. Tokyo-ah chuan ruah tam tak sur tan tawhin Tozai-a leihnuai inkalpawhnate chu tui a luh nasat avangin khar rih a ni.
Japan-a chhiatna thleng theia inralrinna dar khawn rin theih ber, level-five alert khawn niin Kagoshima, Miyazaki, Oita, Kumamoto leh Yamaguchi huam chhunga mi 5,00,000 chuang inring tura tih an ni.
Kyushu, Shikoku leh Chugoku huam chhungah level four alert khawn niin mi maktaduai kua vel hmun hima insuan chhuak tura hriattir an ni bawk.
An ramin khuarel thil thleng a tawrh mek avang hian Prime Minister Fumio Kishida pawhin UN General Assembly-a thu a sawina tur, New York pana zin a tum chu Thawhlehni thleng atan a thulh rih a, boruak a la ngaichang rih mek a ni.