Mizoram Pradesh Congress Committee (MPCC)-in nimin khan Congress Bhavan-ah Siam thar Lehna crusade thawh hnihna an hmang a, Rev. Vanlalzuata’n ‘Nang malsawmna ni ang che’ tih thupui hmangin Pathian thuchah a sawi.
Rev. Vanlalzuata chuan Pathian thuin politics te, economy te, ni tin nunphung te a huap vek tih sawiin, “Pathianin Abrahama a koh chhan chu mi dang tana malsawmna a ni a, hei hian kan politics-te hi a fun vekin ka hria,” a ti a. “Malsawmna ni turin Pathianin mipuite hmangin sorkar min pe thin a, chu sorkar chu mipuite tana malsawmna ni turin Pathianin min ko va, sorkar tha chu mipuite pawhin mal an sawm let thin a ni,” a ti.
“Tunlaiah Sodom khawpuia cheng ang main duhamna a nasa hle,” tiin Rev Vanlalzuata chuan politics leh party chhungah chauh pawh ni lovin, ram pum pui chu sum leh paia duhamnain a chim tawh niin a sawi a. “Thluaka thisen thisen tling chu hlauhawm hle mah se, thluaka sum tling hi a hlauhawm daih zawk,” a ti.
Thluaka duhamna tlingin ram politics a tidik lo tih sawiin, “Kohhran hmel a tichhia a, chhungkua leh khawtlang nun a tihmelhem thin,” a ti a. Chhiar sen loh neih hnuah pawh hman chawp tlem la mamawh khawpa duhamna Mizoramah a thleng mek niin a sawi.
Rev. Vanlalzuata chuan, “Sum hian min tinuam lo, a hmuhna dik lova kan hmuh phei chuan min tihrehawm,” a ti a. “Politician hausa chu ruk a ru a nih loh chuan a dik lo, kohhran rawngbawl hna te, politics leh ram hruaina kan tih zawng zawng mahni rawngbawl lova mi dang rawngbawl hi politics chu a ni,” a ti.
“Mi dang tana malsawmna nih hi mihring dam chhan a ni, mahni tanghma ringawt um chu a nung lo a ni,” a ti a. “Mi dang tana malsawmna ni ngai lo chu Pathian fakin ban phar mah se a phar thlawn mai a ni,” a ti bawk.