Aizawl : National Students’ Union of India (NSUI), Mizoram state hruaitu ten PWD Engineer-in-Chief Er. Bowmen-a hmuin, Hualngohmun khaw hnuaia BN nursing hostel bul World Bank road ka- wng chhe lutuk siamtha tura ngenna an lo thlen tawh chungchang an sawipui.
Helai kawng siamthatna tur sum chu a awm tawh thu leh ruahtui a tlak leh thin avanga a chhak lam a min belh thin vanga chawlhsan rih an nih thu PWD Engineer-in-Chief chuan a lo hrilh niin, NSUI, Mizoram state hruaitute chuan an sawi a. Chak taka hma la tura theihtawp an chhuah turin a lo chhang niin an sawi.
NSUI, Mizoram state hruaitute chuan Aizawl – Lunglei road, Tlawng lei leh Pukpui inkar kawng chhe lutuk leh Mizoram hmun hrang hranga kawng siamtu contractor thenkhat hnathawh muang lutuk chungchang pawh PWD Engineer-in-Chief hnenah hian an thlen tih an sawi a. Lunglei road Tlawng lei leh Pukpui inkar kawng chu a chhiat zin em a vanga a zirchiangtu tur study team din a nih thu leh vawiinah a hmuna an tlawh tur thu PWD Engineer-in-Chief chuan a lo hrilh niin an sawi.
Mizorama contractor tam takin hna an thawhmuan thin chungchangah pawh PWD Engineer-in-Chief chuan hma an lo lak tur thuin a lo chhang niin NSUI, Mizoram state hruaitute chuan an sawi bawk.