Italian rider Enea Bastianini chuan lap hnuhnung berah a hnampui Francesco Bagnaia chu a lehpel a, Aragon Grand Prix-ah pakhatna a hauh.
Pathianni tlaia MotoGP season kallaia intlansiak round 15-na hi Spain a MotorLand Aragón-ah tlan a ni a. He intlansiak avang hian kumin world championship inchuhna boruak a ngaihnawn lehzual dawn.
World championship hmahruaitu champion lai Fabio Quartararo chu intlansiak tlan tan hnu lawkah Marc Marquez nen an intai avangin a tlu a, a tlan chhunzawm thei lo.
Thla li a chawlh hnua intlansiak leh Marquez hi Takaaki Nakagami nen inti fuh lehin a tlan zo thei lo ve lehnghal a. Spanish rider thiam loh niin lang lo mahse dem a hlawh.
Tlarhma lamah Ducati bike khalhtu pahnih an inum a hmuhnawm hle a. Lap 9-na atang pelh tumin an inum zak zak hnuah lap hnuhnung berah, kual ulh ber kual 7-naah Bastianini-a’n mawi takin a pel a. Bagnaia hian a pel let thei tawh lo.
World title inchuhna inhawng zau mahse constructors’ championship erawh Ducati in an la fel tawh.
“Mumang ang mai a la ni, tihsual neuh neuh ka neih hnua a tawpa Pecco ka va hnaih leh theih viau avang khan ka huntha neih kha hman tangkai ngei ka tum ran.” tiin a chak dan Bastianini chuan a sawi.