India ramah darkar 24 liam ta chhungin coronavirus kai mi 4,043 hmuh chhuah leh hman an ni a, mi 4,45,43,089-in an kai tawh.
Union health ministry-in a chhinchhiah dan chuan hri kai enkawl lai an pun leh hret hnuah kiam lam pan lehin mi 47,379 an la awm mek.
Darkar 24 liam ta chhungin Covid vanga thi mi 15 chhinchhiah belh leh hman an ni a, an zinga mi paruk erawh a hma lama thi tawh, Kerala-a chhinchhiah thar an ni a. An vaiin mi 5,28,370-in hripui hi an thihpui tawh a ni.
Hri kai hmuh chhuah tawh zawng zawng zat atanga chhutin a kai enkawl lai hi 0.11% an la ni mek a, 98.71% erawh chu enkawl dam leh tawh an ni tih ministry chuan a tar lang.
Darkar 24 liam ta chhungin enkawl lai zat hi mi 648-in an tlahniam leh hman a. Darkar 24 liam ta chhunga sample endik zinga 1.37 chuan hri an kai tih finfiah a ni a, chawlhkar khat liam ta chhunga endik zinga 1.81%-in an kai tih hmuh chhuah a ni bawk.
Hri kai hmuh chhuah tawh zawng zawng zinga mi 4,39,67,340 chu enkawl dam leh tawh an ni a, a kai hmuh tawh zinga 1.19% chuan an thihpui a ni.
Health ministry-in a chhinchhiah dan chuan nikum January thla laihawl atanga ram puma Covid laka invenna pek beihpui thlak kal mek zelah vaccine dose vaibelchhe 216.83 pek a ni tawh tih an sawi.
Darkar 24 liam ta chhunga thi chhinchhiah bik mi pakua zinga mi pahnih ve ve chu Haryana leh Maharashtra-a mite an ni a, state pahnih hi thawh tam ber an ni.
India ram pumah hian Covid vanga thi tawh zawng zawng zinga a tam zawk hi a hmaa natna benvawn nei lawk an ni.