Thla thara Congress party president thar thlan turin boruak a nei lian tan mek a. Chuh tum angin Ashok Gehlot-a sawi ruk mek a ni a, hetih lai hian an state Congress chuan Rahul Gandhi-a zawk chu ni tura nawr a tum.
Rajasthan Chief Minister Gehlot-a chuan party-in kum 40 liam ta chhungin thil tam tak a tihsak tawh a, a tan eng chanvo leh nihna mah pawimawh a awm hran lo niin a sawi.
Gehlot-a hian Zirtawpni hian Kanyakumari atanga Kashmir thleng Bharat Jodo Yatra nena zin mek, Gandhi-a chu Kochi-ah a hmu dawn a, a kawm dawn.
Nilainia Delhi-a party chief nihna a chuh dawn nia sawi chungchang an zawhnaah Gehlot chuan party-in chanvo an pek apiang pawmin tih tur an tuk a hlen mai dawn thu a sawi.
“Vanneihthlak takin ram puma Congress mi leh saten keimahah rinna, hmangaihna leh rinngamna an nei a, hei hi tih tura min tukte pawh ‘aih’ ka tih theih loh chhan tur a ni a. An tih apiang ka ti ang a, inthlan hi chuh tura min tih pawhin ka ti mai ang. Chief minister turin min ti a, ka ni mai a, ka ti zel dawn a ni,” a ti.
Delhi-ah emaw, Rajasthan-ah emaw pawh ni se Congress tan a thawk zel dawn tih a sawi a, “Party tan engkim ka pe a, ka tan eng nihna mah pawimawh a awm bik lo. Min pe lo a nih chuan eng chanvo mah ka chelh lo mai ang,” a ti.
Gehlot-a hian Gandhi-a’n yatra a neih mek chu a zawm ve dawn tih a sawi a bawk a. Thawhlehni tlai khan Jaipur-ah Congress MLA-te hmuin thil an sawiho bawk.
Hetih lai hian Kochi-ah Gehlot-a thachhangdawltu thin, Sachin Pilot chuan state hrang hrang Congress unit-te chuan Gandhi-a chu thu a lo tihtluk tawh suta party president ni leh turin thu an titlu hlawm tih a sawi.
An hruaitute pawhin hei hi an hria tih a sawi a, “Thutlukna siamtu tur pawh an ni a. Tute nge chuh dawn leh tu nge thlan ni ta chu a la hriat dawn a. Hetiang hi Congress inthlan dan a ni,” a ti.
Pilot-a hi Rajasthan-ah Gehlot-a chu party president thlan a chuh dawn chuan chief minister atangin a bang dawn tih sawi thawm, thu chiang lo a awm mek laiin Kochi-ah hian Bharat Jodo Yatra zawmin a kal ve a. Kum 2020-a party chhunga helna a chawh chhuah hnuah khan deputy chief minister a nihna hlihsak a ni.
Tar lan tawh angin Congress president thar thlan hi October 17-ah tur niin kum 22 hnua a vawi khat nan mi pahnihin an chuh hmel a. Kum 2000-a an inthlanah khan Jitendra Prasada chuan Sonia Gandhi a hneh lo.
Thawhtanni khan Shashi Tharoor-a’n Congress President Sonia Gandhi hmuin an inthlan tur chu ‘dik leh langtlang tak’ ni turin a sawipui a, a chuh duh tu pawhin chuh mai se a duh thu a hrilh a. Tharoor-a pawh hi chuh tura sawi rik zinga mi a ni.
Gehlot-a hi September 24-ah New Delhi-ah kir lehin September 28 thleng chamin hetih chhung hian inthlan chuh tura a hming pek rin a ni.