Hun engemaw chen atangin thu a thang tawh a, inbiakna uluk taka kalpui a nih hnuah engkim a chiang a. Nakkumah India ah khawvela bike intlansiakna ngaihhlut leh dahsan ber MotoGP tlan an beisei.
MotoGP sumdawnna neitu Dorna Sports leh Noida a hmunpui nei Fairstreet Sports te chuan kum sarih chhung atan inremna an ziak.
India a intlansiak hi Grand Prix of Bharat tih a ni dawn a. Greater Noida a tlankawng Buddh International Circuit ah an tlan ang. A hun tur hi puanzar la ni lo mahse MotoGP in nakkum calendar a tihchhuah turah telh ngei an tum. Season thar calendar-ah hian intlansiak a pun dawn avangin a tel ngei a beiseiawm.
“Kan tih awm reng a ni”
Dorna Sports managing director Carlos Ezpeleta chuan India chu khawvela two wheeler sumdawnna lian ber a nih avangin MotoGP in intlansiak a buatsaih chu thil ngaihtuah rei ngai miah lova thutlukna awlsam a ni tiin a sawi.
“MotoGP hian khawvel pumah ngainatu a neih belh zel avangin khawvel hmun hrang hranga kan fans te tana intlansiak buatsaih hi a pawimawh. Kumtin fans leh rider-te an pung zel a, MotoGP hmasawnpui kan tumnaah India hi a pawimawh hle.” a ti a.
“Tunhnai kum 10 chhungin MotoGP World Championship hian kawng hrang hrangin hma a sawn a, inelna pawh a hmuhnawm telh telh. Grand Prix of Bharat pawh hian India ah hma min sawn belhtir ngei ka beisei.” a ti bawk.
Chiang zawkin
Nakkum atan MotoGP intlansiak thlen tir ngei an tum a, a hlawhtlin a beiseiawm rualin tihfel tur erawh a tam. Mahse India sorkar a Sports Ministry leh Uttar Pradesh sorkar ten hma an la dawn a, beisei a sang.
Intlansiak a thlen theihna turin bike intlansiakna thuneitu Federation Internationale de Motocyclisme chuan an tlanna tur BIC hi a endik vek phawt a ngai.
Greater Noida a tlankawng hi India in kum 2011 atanga 2013 chhunga a thlen Formula 1 intlansiakna atana siam a ni. A hmunhma tha hle mahse a tlankawng tak erawh bike intlansiakna atan siam danglam leh thawm that a ngai dawn.
Engtinnge en dan tur?
Two-wheeler racing ngaina Mizote tan pawh world class inelna a hmunah a en theih dawn. Grand Prix pakhat hi ni thum chhung a ni thin a. Zirtawpni-ah practice hun tlanin Inrinni-ah practice leh qualifying niin Pathianni-ah intlansiak a ni thin.
Ticket hi MotoGP website kaltlangin a ngaihven theih a. Intlansiakna neihna ram leh a hun a zirin a man erawh a inang lo thin.
Chutihrualin ticket man tlawm pawl hi Dollar 50 (Rs. 4000) vel te a ni thin a, Asia chhim lama intlansiak thenkhatahte erawh Dollar 23 (Rs.1850) velte pawh a ni ve thin.