- Ruata
Tata Motors chuan an subcompact crossover SUV hralh kal tak Punch-ah edition thar, Camo Edition an tlangzarh leh ta a. Rs Nuai 6.85 – 8.63 (ex-showroom, Delhi) man inkar a ni dawn a ni.
Camo Edition hi Punch bikah special edition pahnihna a ni dawn a, a hmain Tata chuan Kaziranga Edition an lo tichhuak tawh a ni. Punch Camo Edition hian a pawn lam rawngah leh a chhung thenkhatah a pangngai chhuak mek aia danglamna a rawn nei ang a. Hetihrual hian a khawl leh thildangah chuan a danglam dawn lem lo a ni.
Tata Punch Camo Edition pawnlam leh chhunglam
Tata Harrier Camo Edition-a kan hmuh ang bawkin Punch Camo Edition-ah hian a langsar deuh ber chu a pawnlam rawng atana Foliage Green an hmang hi a ni a. Hei bakah hian a lirthei chungah dual-tone effect chu Piano Black leh Pristine White ten a awm bawk a ni.
Heibakah hian a chrome trim, a grille hnuailama kan hmuh chu an rawn ti dum (blacked out) a, a hma bumper-ah silver skid plate thar a awm bawk a, a pangngaia dual tone wheel a hman pawh an rawn ti dum vek bawk a ni. Hei bakah hian a hmalam fender-ah ‘Camo’ badging a awm bawk a ni.
A chhunglamah chuan Punch Camo Edition hian military green shade thar a nei a, hei hi a dashboard-ah niin a seat te pawh camouflage ziarang a awm vek bawk a ni.
Kentel hrang hrang
Punch Camo Edition hi Tata Punch-a a mid-spec Adventure leh Accomplished trim-ah te a awm a. A top-spec Creative trim in a neih ang thenkhat te pawh a rawn nei tel dawn a, a kentel hrang hrang zingah hian 7-inch infotainment system with Android Auto & Apple Carplay, 16-inch alloy wheels, reverse parking camera, LED DRLs, push start/stop button, cruise control, front fog lamps leh thil hrang hrang a awm bawk a ni.
A khawl leh gearbox
Tata Punch pangngaiin a hman ang tho chu Camo Edition-ah pawh hian kan hmu dawn a. He khawl hi 1.2-litre, three-cylinder naturally aspirated petrol khawl niin 86hp power leh 113Nm torque a pechhuak thei a. 5-speed manual leh AMT gearbox te duhthlan tur a awm bawk a ni.
A elpui turte
Tata Punch elpui hrang hrangte chu Maruti Suzuki Ignis, Mahindra KUV100 NXT bakah Renault Kiger leh Nissan Magnite te a nih hmel a. Market lamah he edition thar hian Punch hralh a ti nuam zual em tih i han ngaichang leh phawt mai teh ang.