AZL: BJP Mizoram State President Vanlalhmuaka’n, “COVID-19 avangin Mizoramah sum harsatna a awm lo va, sum enkawl thiam loh avanga suma harsa ta zawk kan ni,” a ti.
BJP pisa, Atal Bhawan, Aizawla political session-ah he thu hi BJP Mizoram state president chuan a sawi a. “Kan state chief minister hian Made in Mizoram a that ber thu leh Made in India chu an duh loh thu sawi thin mah se, a thil tihah Made in India tha a tih zawkzia a lang zel,” a ti a. “Thenawm state zawng zawngin Made in India party BJP sorkar neia an din chhuahpui laiin, keini state sorkar, Zoramthanga kaihhruai sorkar chuan hmai hnih neiin, lehlama awr sen lehlama awr duma min kaihhruai avangin sumah harsatna kan tawk chho mek ta a ni,” a ti bawk.
Lengpui Airport chungchang sawiin Vanlalhmuaka chuan, “Chief Minister Zoramthanga’n, ‘Engti kawng mahin AAI kutah kan hlan thei lo, India ram state zingah airport nei awmchhun kan ni,’ tia a sawi lai mekin tun hnaia Mizorama lo zin union minister chuan Lengpui Airport chu state sorkarin AAI kuta hlan tura hma a lak thu leh inremna tur duan chhin pawh Mizoram state sorkar hnena thawn a nih tawh thu min hrilh,” a ti a. “Kan state sorkar hian kan airport pawh enkawl zo lovin a lo surrender der tawh tihna a ni,” a ti.
BJP Mizoram state president chuan, “Kan medical college neih chhun, Zoram Medical College pawh state sorkarin sum a neih loh avanga a enkawl theih tak loh avangin central sorkarah laksak turin union health minister hnenah ziakin Mizoram CM-in a thlen leh ta a ni,” a ti a. “Lengpui Airport a ni emaw, medical college chungchang a ni emaw, kan state ramri chungchangah a ni emaw, kan chief minister hian mipui hmaah thu dik sawi thin se, dinna nghet nei se tih hi BJP Mizoram Pradesh chuan kan phut a; New Delhi-a a thu zuk sawi thin leh Mizorama a thusawi thin te a inpersan thin hi sim vat turin kan chief minister hi kan chah a ni,” a ti bawk.