Ruahmanna mumal nei lova bazar hmun thiah
Aizawl New Market building thiah a nih avangin Chawhmeh zuarten harsatna an tawk nasa hle mai a, eizawnna neih loh phah thahnem tak an awm mek. Sorkar lah chuan an awmna hmun tur ngaihtuah hmasa lovin a thiahsak mai niin a lang bawk si, a pawi thin ngawt mai.
Tun hnaiah pawh chawhmeh zuarte mangang chuan thut luih tumin an chawhmeh neih ang ang an phochhuak a, mahse duty te nen inbe remin hmalakna an ngaichang leh ta zawk a, rahtha chhuah chho zel se a duhawm khawp mai.
New Market a chawhmeh zuarte hian member 400 chuang velin thutna tur an neih loh thu an sawi a, bazar hmun an thiah tak avanga sorkar in thutna a siamsakah lah mi 30 vel bak an len loh thu sawiin, chawhmeh zuartute chuan chhungkaw chawm nan tak taka hmang an nih avangin harsatna an tawh nasat tawh thu an sawi hial maite hi sorkar hian ngaihthah mawlh suh se.
Bazar thar sak kan lo duh tawh a nih pawhin a thu nghette lo awm lailawkna tur hmun zau tha leh an indaih ngeina tur tal ngaihtuah hmasa chungin ruahmanna siamlawk a ni lo hi a pawi hle mai a. Hri leng karah chhungkaw eizawngtu ber tan phei chuan a hrehawm duh ngawt ang.
Tin, pawisa awmsa hmanga hnathawh a nih chuan rang leh chak zawka thawh ni zel se la, kan bazar hmunpui berah pawh hian chawhmeh zuarte tana thut lailawkna tur tal hi chu ruahman tel dan awm se. An hmunhma siamah lah an indaih lo nasa si a, thutna nghet nei ho tal awmna tur remchang siamsak dan awm mawlh teh se.