Sorkar hnathawkte hlawh ni lo, bill dang pawh ngaihtuah a ngai
Hri leng vangin mi tam tak kan mangang a, sorkar hnathawkte hlawh thlengin hri leng hian a nghawng nia sawi a ni thin. Mahse, tun hnaia Treasury officer te sawi dan chuan sorkar hnathawk pek theih loh an la nei lo a, sorkar in a hnathawkte hlawh a la pe tluang zel thei.
Hetiang a nih lai hian supply bill hrang hrang leh contract hnathawhna bill te erawh a la tang reng a, pekchhuah theih a nih hun an sawi thei lo thung a niawm a. An khawlkhawm tam viau tawhin a rinawm a ni.
Sorkar hnathawkte hian hlawh an la zel thei hrim hrim hi a lawmawm hle a, kan ramah hi chuan mipuite hi thui tak sorkar hnathawkte hlawhah hian kan innghat bawk nen, a zia a la awm. Mahse, bill tlem tlem tang fo erawh a buaithlak chho ta hle mai a, sorkar hian engtikah tak pe chhuak thei ang i maw?
Sum harsatna hrim hrim hi chuan nghawng a nei thui tih treasury hotute chuan an sawi a, GP Fund an pek hleih theih tawh loh bakah pension te pawh la pe zel thei mah se, pension hlim, a hlawma sum la duhte erawh an pe thei tawh lo a, sum an tih tan rih zel a ngaih thu an sawi a ni.
Thawhchhuah nei lo state tan chuan a manganthlak tawh hle ang tih a rinawm a, mah se sorkar hian mipuite retheihna khurpuia kan luh tam tak tak hma hian a hnathawkte hlawh ringawt ni lo, bill tenau neuh neuh thlenga pekchhuah dan kawng hi zawng chho mawlh tawh teh se. Kal ngaihna hre lo chhungkaw tam tak kan awm chho mek tihte min hriatsak tawh se a va tha em!