United States chhim lam, Alabama state chu tornado-in a nuai a, hriat theih chinah mi panga an thi a, thil tihchhiat pawh a ngah hle.
Thite hi Calhoun County-a khaw tak teh te, Oatchee-a mite vek an ni tih tual chhung emergency agency chuan a sawi a. Thlipui hian chenna in tam tak tichhiain thing a phawng nasa hle tih an sawi.
Tornado hian Chilton County a nuai a, Shelby Country a nuai chhunzawm leh bawk.
“Tornado kalkawnga khaw awmte inring turin ngen an ni a, kan thlipui hi a la hlauhawm hle,” tiin Governor Kay Ivey chuan a sawi a, “Kan chhiatna ni hi a la liam lo,” a ti bawk.
National Weather Service pawhin, “Tornado kha lo en kher tum suh u! A kalkawngah in awm a nih chuan himna tur lo ngaihtuah r’u,” tiin Twitter-ah an tar lang bawk.
Social media-ah mi tam takin Alabama a nuai lai video leh thlalakte an theh darh nasa hle.
Kum 2019 khan Alabama hi khawchhak lam tornado pahnihin a nuai tawh a, naupang pathum telin mi 20 chuang an thi a. Hemi tum hian kawngpui leh in a chhe nasa hle.
First Lady Jill Biden chuan lemchan thiam, Jennifer Garner nena he state an tlawh tur hi a thulh a. Biden-i hian Birmingham-a kala tun hnaia pawm thar, Covid relief package chungchang tlangaupui a tum a ni.