Aizawl: Mizoram State Sports Council chuan tun dinhmunah Kawnpui Hockey Ground chei that tumna a awm rih lo a ti a; hetihlai hian ground tihhuhna tura tui pump khawl a chhiat avangin inkhelhpui buatsaih nan hman ngam a ni rih lo thung.
RTI hmanga zawhna Mizoram State Sports Council SPIO-in a chhannaah, “Kawnpui Hockey Ground hi tun dinhmunah chuan chei that tumna a awm rih lo,” a ti a; hetihlai hian District Sports & Youth Officer, Kolasib chuan tui pump khawl siam that theih a nih loh avangin harsatna an tawk mek tih a sawi.
Hockey Mizoram pawhin ram pum huap tournament buatsaih an tum pawh inkhelhpui buatsaih nana ground hman ngam a nih rih loh avangin a hun tur an la sawi chiang thei lo tih thudawnna chuan a sawi bawk.
DSYO Kolasib hnen atanga thudawn dan chuan Covid-19 leng avanga hun eng emaw chen hockey ground hi khar a nih avang leh rei tak chhung khawl tihnun/hman a nih loh avangin kum 2020 tawp lam atang khan tui pump khawl leh generator chu hman theih lohin a lo chhia a, mi thiamte ko thlain generator hi siam a ni a, starter chhia chu a part thlak mai theih a nih avangin siam that mai theih a nih rualin tui pump khawl erawh a siam thiamte hnenah phurh kual a nih hnuah pawh siam that theih a ni lo va, “A motor a chhia a ni,” a ti.
Tun dinhmunah hian Boys Hockey Academy-ah naupang 22 an awm mek a, zing leh tlai lamah ground chu practise nan an hmang thin.