Chawlhkar kalta Inrinnia Kolasib Fast Track Court building sakna tur lungphum phumnaa Abu Majumdar a tel dan leh Mizoram sorkar nena an inkungkaih dan sawi fiah turin sorkar an phut thu ZPM PAC Member TBC Lalvenchhunga’n a sawi.
Nimin khan Kolasib Press Club-ah thu thar thehdarhtute kawmin TBC Lalvenchhunga hian Inrinnia Kolasib Fast Track Court building sakna tur lungphum phumnaah Majumdar a tel dan chu district court lamah an zawh fiah hnuah, an sawm zingah a tel lo tih an mi sawmte ziahna list, high court judge-in a pawmpui an pek atangin a chiang tih a sawi.
Hetihlai hian lungphum phumna mai ni loin Inrinni zingah Supply Minister K. Lalrinliana chenna inah tukthuan ei tur an lo buatsaihsak tih an hriat chian thu a sawi.
TBC Lalvenchhunga hian, “State danga court thubuai neih avanga bail-a chhuak lai Abu Majumder, Mizoram a rawn thlen theih dan te, high court judge programme-ah a tel theih dan te, a ILP hi tunge sponsor tihte hi Chief Minister Zoramthanga leh Supply Minister K Lalrinliana te hian mipui hriatah sawifiah rawh se,” a ti.
September 26, 2021 khan New Delhi-a Mizoram leh Assam chief minister te an inkawmnaah sawm bik zingah Abu Majumdar hi tel tawhin hemi chungchangah Chief Minister Zoramthanga a insawifiah atanga kum khat awrh a liam hnuah supply minister inah tukthuan an buatsaihsak hi state dangin court thubuai awrh mek, bail-a chhuak lehten minister-te in meuha bul mal thlauh theia khual tha thlena a thlen dan leh tun thlenga buhfai supply-tu contractor zinga a la tel reng theih dan te sawi fiah an phut thu ZPM PAC member hian a sawi a ni.