Aizawl: Congress party chuan ‘Siamthar Lehna Crusade’ thawh thumna chu nimin khan hmangin, he huna thusawi tura an sawm, Rev Vanlalzuata chuan, “Ram hruaituten an rilruah a ram leh a felna an dah hmasak hunah pathian malsawmna ramin kan dawng ang,” a ti.
Rev Vanlalzuata hian a ram leh a felna zawn hmasak a pawimawh tih sawiin, Pathian dah hmasak ber chu thiltih makmawh a nih thu leh Pathian dah hmasa lo a, a thilpek thlakhlelh hmasak chu a pawi thin thu a sawi.
Party hrang hrangten Mizoram dinhmun dik tak an ngaihtuah a hun tih sawiin, “Congress party chauh ni lo, party hrang hrangten Lalpa rawn lo a kan ta emaw tia mahni nawmchenna leh induhsak tawnna ringawt mai ngaihtuah kan nih chuan Pathian kut kan la tuar dawn,” Rev Vanlalzuata’n a ti.
Congress party hian Pathian biak inkhawm leh tawngtai rual hun hi chawlhkar tir Thawhtanni apiangin an hmang thin a. Nimina Siamthar Lehna Crusade thawh thumna hi MPCC PAC Secretary PB Lalsawmliana’n a kaihruai a ni.