AZL: Tuipuiral Zirlai Pawl (TZP) chuan Schemes of North Eastern Council sum hmanga Samthang Zophulpui Nature Park siam chungchangah uchuak taka sum tihchingpen a awm ngeiah an ngai tih chanchinbumite hmaah an sawi a, he project chungchang chhui turin Mizoram Lokayukta-ah complaint an theh lut.
TZP general headquarters hruaitute chuan nimin khan Aizawl Press Club-ah chanchinbumite an kawm a, an president, Zorammawia chuan Rs nuai 359.21 hmanga thawh tura ruahman, Samthang Zophulpui Nature Park chu April 22, 2022 leh July 29 leh 30, 2022-ah te a hmunah an tlawh a, hnathawh chhe lutuk leh a nih dan tur ni loa hnathawh loh tam tak an hmu tih a sawi.
He project kaihhnawiha a thawktu Champhai DC office leh Planning & Programme Implementation department-a RTI hmanga zawhna an zawh chhanna hrang hrang leh hnathawh tawh an enah thil inmil tawk lo eng emaw zat a awm tih sawiin, “RTI zawhnaa a lan danin he project hi zawh tawh a ni a, February 25, 2022 khan hnathawk zo lantirna pawh pek chhuah tawh a ni,” a ti a, hetihlai hian estimate-a tel ngei la awm lo eng emaw zat a la awm a, bungraw chah mek leh thlen belh pawh a la awm lawi a, plan tihdanglam pawh a awm nual tih a sawi a ni.
TZP president chuan Samthang Zophulpui Nature Park-ah implementing agency chu Champhai DC office a ni angin hnathawhnaa mawhphurtu ber an ni tih sawiin, he hnaah hian uchuak taka sum tihchingpen a awm ngei nia an ngaih thu te, a nih tur ang ni pha lo leh thawh tur ang thawk zo lo leh bungrua awm tur awm kim si lo chunga completion certificate pek a ni te chu an hrethiam lo tih a sawi.
He project-a sum hman ngei tura ngaih hman loha awmte chu tu kutah nge a awm tih an hre duh a, hna thawh nana hman a nih leh ngei an phut tih leh thuneituten a rang lama hma la tur leh hrem ngai an awm a nih chuan hrem ngam turin an phut tih a sawi bawk.
TZP hruiatute hian chanchinbumite an kawm zawh hnuah Samthang Zophulpui Nature Park siam chungchang chhui chiang turin Mizoram Lokayukta- ah complaint an theh lut bawk a ni.